ភ្នំពេញ៖ ក្រុមហ៊ុន YCH Group មានបំណងវិនិយោគលើហេដ្ឋារចនាសម្ព័ន្ធតភ្ជាប់នៅកម្ពុជា ដែលមានវិស័យដឹកជញ្ជូន និងឡូជីស្ទីកជាដើម។ នេះបើតាមការលើកឡើងរបស់ លោក Robert Yap ប្រធានក្រុមប្រឹក្សាភិបាល នៃក្រុមហ៊ុន YCH Group ក្នុងជំនួបជាមួយសម្ដេចធិបតី ហ៊ុន ម៉ាណែត។

ក្នុងកិច្ចពិភាក្សា នាថ្ងៃទី២៨ ខែវិច្ឆិកា ឆ្នាំ២០២៤ សម្ដេចធិបតីនាយករដ្ឋមន្រ្តី បានបញ្ជាក់ពីការយកចិត្តទុកដាក់យ៉ាងខ្លាំងលើការកសាងប្រព័ន្ធហេដ្ឋារចនាសម័្ពន្ធតភ្ជាប់ក្នុងវិស័យខាងលើ និងបានលើកឡើងពីការយកចិត្តទុកដាក់ជាអាទិភាពរបស់រាជរដ្ឋាភិបាល ដើម្បីធានាឱ្យបាននូវបរិយាកាសអំណោយផលដល់ក្រុមហ៊ុន ដែលកំពុងតែមានប្រតិបត្តិការអាជីវកម្ម និងវិនិយោគនៅកម្ពុជា។

ជាមួយគ្នានេះ សម្ដេចធិបតី ហ៊ុន ម៉ាណែត ក៏បានលើកទឹកចិត្តឱ្យក្រុមហ៊ុនបន្តពិភាក្សាឱ្យបានលម្អិត ជាមួយនឹងក្រសួង-ស្ថាប័នពាក់ព័ន្ធរបស់រាជរដ្ឋាភិបាល ក្នុងការរៀបចំផែនការអាជីវកម្ម នាពេលអនាគត របស់ក្រុមហ៊ុន។ គួរបញ្ជាក់ថា ក្រុមហ៊ុន YCH Group កំពុងមានប្រតិបត្តិការនៅតាមបណ្ដាប្រទេសចំនួន១៦ និងមានឧត្តមភាពលើផ្នែកដឹកជញ្ជូន និងឡូជីស្ទីក ដែលបានធ្វើឱ្យក្រុមហ៊ុនមួយនេះ ប្រែក្លាយជាក្រុមហ៊ុនឈានមុខមួយនៅក្នុងខ្សែច្រវាក់ផ្គត់ផ្គង់សម្រាប់តំបន់អាស៊ី៕