ភ្នំពេញ៖ សភាពាណិជ្ជកម្មកម្ពុជា ស្នើឱ្យការិយាល័យសេដ្ឋកិច្ច និងវប្បធម៌ តៃប៉ិប្រចាំនៅវៀតណាម ជួយកៀរគរវិនិយោគិនតៃវ៉ាន់ មកបង្កើតអាជីវកម្ម ឫបង្កើតរោងចក្រនៅកម្ពុជាឱ្យបានច្រើនតាមដែលអាចធ្វើទៅបាន។ នេះបើតាមការលើកឡើងរបស់ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា ក្នុងជំនួបជាមួយអ្នកស្រី Tzung Yuh (Joann) Chen អគ្គនាយិកានៃការិយាល័យសេដ្ឋកិច្ច និងវប្បធម៌ តៃប៉ិប្រចាំទីក្រុងហូជីមិញនៃវៀតណាម។

ក្នុងជំនួបពិភាក្សាការងារនាថ្ងៃទី២៦ ខែវិច្ឆិកា ឆ្នាំ២០២៤ អ្នកស្រី Tzung Yuh (Joann) Chen ក៏បានស្នើឱ្យសុំកិច្ចសហការក្នុងការផ្សព្វផ្សាយ និងអញ្ជើញសមាជិករបស់សភាពាណិជ្ជកម្មកម្ពុជា ចូលរួមពិធីតាំងពិព័រណ៌ 2025 Smart City Expo និង 2050 Net Zero City Expo ដែលនឹងប្រព្រឹត្តិនៅថ្ងៃទី១៨-២២ ខែមីនា ឆ្នាំ២០២៥ នៅតៃវ៉ាន់ផងដែរ។

ជាមួយគ្នានេះ ឧកញ៉ា ងួន ម៉េងតិច ក៏បានអបអរដល់អ្នកស្រី Tzung Yuh (Joann) Chen ដែលទទួលបានតំណែងជាអគ្គនាយិកានៃការិយាល័យសេដ្ឋកិច្ច និងវប្បធម៍ តៃប៉ិប្រចាំនៅទីក្រុងហូជីមិញនៃប្រទេសវៀតណាម និងបានពិនិត្យនូវកិច្ចការដែលអ្នកស្រីអគ្គនាយិកាបានលើកឡើងផងដែរ៕