ភ្នំពេញ៖ កម្ពុជា-ជប៉ុន បន្តពង្រឹង និងពង្រីកនៃកិច្ចសហប្រតិបត្តិការរវាងប្រទេសទាំងពីរ នៅលើវិស័យជាច្រើន រួមមានជាអាទិ៍៖ វិស័យសេដ្ឋកិច្ច និងពាណិជ្ជកម្ម, អប់រំ, គមនាគមន៍ និងហេដ្ឋារចនាសម្ព័ន្ធ, សន្តិសុខ និងសកម្មភាពមីនជាដើម។ ការបន្តពង្រឹង និងពង្រីកនៃកិច្ចសហប្រតិបត្តិការនេះ ត្រូវបានពិភាក្សាដោយសម្ដេចធិបតី ហ៊ុន ម៉ាណែត និងលោកជំទាវ ERI Arfiya អនុរដ្ឋមន្ត្រីការបរទេសជប៉ុន។

ក្នុងជំនួបពិភាក្សាការងារនេះ លោកជំទាវ ERI Arfiya បានលើកឡើងអំពីការរួមចំណែករបស់ជប៉ុនក្នុងការកសាងសមត្ថភាពដល់កម្ពុជា ដែលកម្ពុជាបានវិវត្តន៍ខ្លួនក្លាយជាប្រទេសរួមចំណែកកសាងសមត្ថភាពទៅដល់ប្រទេសដទៃទៀត ក្នុងសកម្មភាពបោសសម្អាតមីនផងដែរ។ ជាមួយគ្នានេះ លោកជំទាវ ERI Arfiya ក៏បានបញ្ជាក់បន្ថែមថា ក្នុងអាណត្តិនៃរាជរដ្ឋាភិបាលថ្មីភាពជាដៃគូ និងកិច្ចសហប្រតិបត្តិការរវាងរដ្ឋាភិបាលជប៉ុន និងកម្ពុជា មិនត្រឹមតែបន្តរក្សាប៉ុណ្ណោះទេ ប៉ុន្តែនឹងបន្តពង្រឹង និងពង្រីកបន្ថែមទៀត។

នាឱកាសនោះ សម្តេចធិបតី ហ៊ុន ម៉ាណែត ក៏បានបញ្ជាក់អំពីទំនាក់ទំនង និងកិច្ចសហប្រតិបត្តិការដ៏ល្អរវាងកម្ពុជា និងជប៉ុន ដែលឈានទៅដល់ភាពជាដៃគូយុទ្ធសាស្ត្រគ្រប់ជ្រុងជ្រោយ និងបានអរគុណដល់រដ្ឋាភិបាល និងប្រជាជនជប៉ុន ដែលបានចូលរួមចំណែកនៅក្នុងដំណើរការនៃការកសាង និងស្ដារប្រទេសកម្ពុជាឡើងវិញ ជាមួយនឹងការអភិវឌ្ឍសង្គម-សេដ្ឋកិច្ច៕