ភ្នំពេញ៖ ក្រុមហ៊ុន MIRARTH Agri Tech Co Ltd ដែលជាក្រុមហ៊ុនជប៉ុន បានបង្កើតរោងចក្រកែច្នៃគ្រាប់ស្វាយចន្ទី កាលពីពាក់កណ្តាលឆ្នាំ២០២៤នេះ នៅខេត្តកំពង់ធំ នឹងនាំចេញផលិតផលគ្រាប់ស្វាយចន្ទីទៅកាន់ទីផ្សារសហគមអឺរ៉ុប ដោយផ្ទាល់ក្នុងបរិមាណ ២៥០តោន សម្រាប់ឆ្នាំដំបូង។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២២ ខែវិច្ឆិកា ឆ្នាំ២០២៤ ដោយក្រសួងបញ្ជាក់ថា សមទ្ធិផលលទ្ធផលនេះ ជាកិច្ចខិតខំរបស់ក្រសួងពាណិជ្ជកម្ម ក្នុងការស្វែងរក និងធានាបាននូវទីផ្សារអន្តរជាតិសម្រាប់ផលិតផលកម្ពុជា។

ក្រសួងពាណិជ្ជកម្ម បានឱ្យដឹងថា ក្រុមការងារជំរុញការនាំចេញ និងមជ្ឈមណ្ឌលសេវានាំចេញ នឹងបន្តជួយបណ្ដាក្រុមហ៊ុននានារបស់កម្ពុជា ក្នុងការពង្រឹងសមត្ថភាពដើម្បីនាំចេញ ដូចក្រុមហ៊ុន MIRARTH Agri Tech Co Ltd ដែលបាននាំចេញផលិតផលកែច្នៃគ្រាប់ស្វាយចន្ទីទៅកាន់សហគមអឺរ៉ុបជាលើកដំបូង។

សមិទ្ធផលនេះ គឺបញ្ជាក់ពីកិច្ចខិតខំរួមគ្នារបស់រាជរដ្ឋាភិបាល ដៃគូពាក់ព័ន្ធ និងវិស័យឯកជនក្នុងការពង្រឹងគុណភាពវិស័យកែច្នៃគ្រាប់ស្វាយចន្ទីកម្ពុជា ឱ្យសមស្របទៅតាមស្តង់ដារអន្តរជាតិ។ ការនាំចេញគ្រាប់ស្វាយចន្ទីកែច្នៃនេះ បានបង្ហាញឱ្យឃើញថា ស្វាយចន្ទីដែលផលិតនៅរោងចក្រក្នុងខេត្តកំពង់ធំ មានគុណភាពស្តង់ដារអន្តរជាតិ ដែលបានចូលរួមចំណែកបង្កើតនូវផលិតផលដែលមានតម្លៃខ្ពស់ និងជាមោទនភាពសម្រាប់ក្រុមហ៊ុន សហគមន៍ និងប្រទេសជាតិផងដែរ៕