ភ្នំពេញ៖ សម្ព័ន្ធក្រុមហ៊ុនឥណ្ឌូនេស៊ីដ៏ធំ មានឈ្មោះ CT Corp ដែលមានប្រតិបត្តិការអាជីវកម្មចម្រុះជាច្រើន ពិសេសលើវិស័យហិរញ្ញវត្ថុ សួនកម្សាន្ត អចលនទ្រព្យ សណ្ឋាគារ និងផ្សារទំនើប មានបំណងបោះទុនវិនិយោគនៅកម្ពុជា។ នេះបើតាមការលើកឡើងរបស់ ឯកឧត្ដមបណ្ឌិត Chairul Tanjung ប្រធានសម្ព័ន្ធក្រុមហ៊ុន CT Corp កាលពីថ្ងៃទី២២ ខែវិច្ឆិកា ឆ្នាំ២០២៤។

ពាក់ព័ន្ធនឹងបំណងវិនិយោគរបស់សម្ព័ន្ធក្រុមហ៊ុនខាងលើ សម្ដេចធិបតីនាយករដ្ឋមន្រ្តី ហ៊ុន ម៉ាណែត បានស្វាគមន៍ និងបានលើកឡើងពីវិស័យសក្តានុពល និងកាលានុវត្តភាពជាច្រើនសម្រាប់ក្រុមហ៊ុនក្នុងទីផ្សារនាំចេញ និងទីផ្សារក្នុងស្រុក។ ក្នុងជំនួបពិភាក្សា សម្ដេចធិបតី ហ៊ុន ម៉ាណែត និង ឯកឧត្ដមបណ្ឌិត Chairul Tanjung បានផ្លាស់ប្តូរយោបល់គ្នាលើកាលានុវត្តភាព និងវិស័យសក្តានុពលលើវិស័យហិរញ្ញវត្ថុ អចលនទ្រព្យ កសិកម្ម និងកសិ-ឧស្សាហកម្ម អប់រំ បច្ចេកវិទ្យា ទេសចរណ៍ សួនកម្សាន្ត សណ្ឋាគារ និងផ្សារទំនើបជាដើម។

លើសពីនេះទៅទៀត សម្តេចធិបតី ហ៊ុន ម៉ាណែត ក៏បានបញ្ជាក់ពីគោលនយោបាយ វិធានការ និងគំនិតផ្តួចផ្តើមរបស់រដ្ឋាភិបាលកម្ពុជា ក្នុងការលើកទឹកចិត្ត ធានាបរិស្ថានធុរកិច្ច ការវិនិយោគ និងភាពប្រកួតប្រជែងរបស់វិនិយោគិនកម្ពុជា។ តាមការគូសបញ្ជាក់របស់សម្តេចធិបតី ហ៊ុន ម៉ាណែត កម្ពុជាមានការតភ្ជាប់ទីផ្សារយ៉ាងទូលំទូលាយក្នុងតំបន់ និងពិភពលោក ជាពិសេសតាមរយៈកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីជាច្រើន។ សម្ដេចធិបតីនាយករដ្ឋមន្រ្តី ជំរុញឱ្យសម្ព័ន្ធក្រុមហ៊ុនខាងលើ បន្តពិភាក្សាជាមួយក្រសួង-ស្ថាប័នពាក់ព័ន្ធរបស់កម្ពុជា ក៏ដូចជាដៃគូអាជីវកម្មក្នុងស្រុក ដើម្បីចាប់យកឱកាសវិនិយោគនៅកម្ពុជា៕