ភ្នំពេញ៖ ក្រសួងពាណិជ្ជកម្ម និងសមាគមសហព័ន្ធអ្នកផ្គត់ផ្គង់ម៉ាកាវ(MUSA) នៃតំបន់រដ្ឋបាលពិសេសម៉ាកាវ របស់ប្រទេសចិន បានចុះអនុស្សារណៈយោគយល់គ្នា(MOU) ភ្ជាប់ទំនាក់ទំនងជាមួយទីផ្សារដៃគូដែលមានអ្នកផ្គត់ផ្គង់ និងអ្នកបញ្ជាទិញផលិតផលជាង ១ពាន់កន្លែង។ តាមការចុះផ្សាយរបស់ក្រសួងពាណិជ្ជកម្ម នាថ្ងៃទី០២ ខែវិច្ឆិកា ឆ្នាំ២០២៤ ការចុះ MOU នាំយកផលិតផលជាច្រើនប្រភេទ ចូលទៅទីផ្សារទំនិញ ផ្សារទំនើបតូច-ធំ ភោជនីយដ្ឋាន សណ្ឋាគារ និងរីហ្សតនៅទូទាំងទីក្រុងម៉ាកាវ និងហុងកុង។

ការចុះ MOU នេះ ធ្វើឡើងនាថ្ងៃទី៣០ ខែតុលា ឆ្នាំ២០២៤ រវាងឯកឧត្តម លឹម ឡោកពិសិដ្ឋ រដ្ឋលេខាធិការ ក្រសួងពាណិជ្ជកម្ម និងលោក KIT HENG LEI នាយកប្រតិបត្តិសមាគម MUSA។ ការចុះ MOU រវាងកម្ពុជា-ម៉ាកាវនេះ ធ្វើឡើងក្នុងបំណងផ្សារភ្ជាប់ទំនាក់ទំនងទីផ្សារដៃគូ និងពង្រីកទំហំពាណិជ្ជកម្មទ្វេភាគី តាមរយៈកិច្ចសហប្រតិបត្តិការជាមួយសមាគម MUSA។

ក្រសួងពាណិជ្ជកម្ម បានឱ្យដឹងថា គិតមកដល់បច្ចុប្បន្ន មានសមាជិកដែលជាអ្នកផ្គត់ផ្គង់ និងចែកចាយជាច្រើនរបស់សមាគម MUSA បានបង្ហាញពីចំណាប់អារម្មណ៍ក្នុងការបញ្ជាទិញទំនិញកសិផលរបស់កម្ពុជា ដើម្បីនាំចេញទៅកាន់ទីផ្សារនៅទីក្រុងម៉ាកាវ និងហុងកុង នាពេលដ៏ខ្លីខាងមុខផងដែរ៕