ភ្នំពេញ៖ រាជរដ្ឋាភិបាលកម្ពុជា សម្រចជាគោលការណ៍ រៀបចំពិធីបុណ្យសមុទ្រលើកទី១១ នៅខេត្តកំពត ដែលប្រព្រឹត្តិទៅនៅថ្ងៃទី១៣-១៥ ខែធ្នូ ឆ្នាំ២០២៤ ដើម្បីផ្សព្វផ្សាយពីសក្តានុពលទេសចរណ៍តំបន់ឆ្នេរសមុទ្រកម្ពុជា។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី០១ ខែវិច្ឆិកា ឆ្នាំ២០២៤។

ក្នុងកិច្ចប្រជុំគណៈកម្មការអន្តរក្រសួង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានលើកឡើងថា ការជ្រើសរើសខេត្តកំពត ដើម្បីរៀបចំពិធីបុណ្យសមុទ្រ នាឆ្នាំ២០២៤នេះ គឺដើម្បីជំរុញការយកចិត្តទុកដាក់ពីគ្រប់ភាគីពាក់ព័ន្ធក្នុងការអភិរក្ស និងអភិវឌ្ឍន៍តំបន់ឆ្នេរ ប្រកបដោយចីរភាព ពិសេសពង្រឹងនិងលើកកម្ពស់គុណភាពសេវាកម្មនានាក្នុងឧស្សាហកម្មទេសចរណ៍។

ឯកឧត្តម ហួត ហាក់ បានបន្តថា ពិធីបុណ្យសមុទ្រនេះ គឺបានរៀបចំ ១០លើករួចមកហើយ ដែលក្នុងនោះខេត្តកំពត បានរៀបចំ ៣ដង គឺនៅឆ្នាំ២០១៥, ២០១៩ និងឆ្នាំ២០២៤ នាពេលខាងមុខនេះ ក្រោមប្រធានបទ «អបអរបេតិកភណ្ឌ និងចីរភាពនៃតំបន់ឆ្នេរ» ស្របនឹងខេត្តកំពតជា «គោលដៅទេសចរណ៍បេតិកភណ្ឌវប្បធម៌ និងកសិ-ទេសចរណ៍តំបន់ឆ្នេរ»ផងដែរ។ គួរបញ្ជាក់ថា ពិធីបុណ្យសមុទ្រលើកទី១១ ឆ្នាំ២០២៤នេះ នឹងធ្វើឡើងក្រោមអធិបតីភាពសម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី៕