ភ្នំពេញ៖ ថ្នាក់ដឹកនាំកំពូលរបស់កម្ពុជា និងប្រ៊ុយណេ បានរៀបចំពិធីអាហារពេលព្រឹកជុំគ្នា ជាលក្ខណៈគ្រួសារប្រកបដោយភាពស្និទ្ធស្នាល នៅកណ្តាលរាជធានីភ្នំពេញ នាថ្ងៃទី៣០ ខែមេសា ឆ្នាំ២០២៤នេះ។

សម្ដេចតេជោ ហ៊ុន សែន ប្រធានព្រឹទ្ធសភា, សម្តេចធិបតី ហ៊ុន ម៉ាណែត នាយករដ្ឋមន្ត្រី, ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងឯកឧត្តម ឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក បានអញ្ជើញចូលរួមក្នុងពិធីអាហារពេលព្រឹកជាមួយព្រះចៅស៊ុលតង់ ហាជីហាសិនណល់ ប៊ូលហ្កះ ព្រះមហាក្សត្រ នៃប្រទេសប្រ៊ុយណេ ដារូសាឡឹម និងព្រះរាជបុត្រ អាប់ឌុល ម៉ាទីន។

ព្រះរាជពិធីសោយព្រះក្រយាព្រឹករបស់ព្រះចៅស៊ុលតង់ និងព្រះរាជបុត្រ ជាមួយសម្តេច តេជោ ហ៊ុន សែន និងកូនប្រុសទាំង៣ ត្រូវបានធ្វើឡើងនៅសណ្ឋាគាររូសវូត ក្នុងអគារវឌ្ឍនៈ ដែលជាសណ្ឋាគារដ៏ប្រណិតកណ្តាលរាជធានីភ្នំពេញ។ ព្រះរាជពិធីសោយព្រះ ក្រយានោះ បានប្រព្រឹត្តទៅក្រោមបរិយាកាសរីករាយ និងស្និទ្ធស្នាលបំផុតប្រៀបដូចជាគ្រួសារតែមួយ។

គួរបញ្ជាក់ថា ព្រះចៅស៊ុលតង់ និងព្រះរាជបុត្រ បានយាងមកដល់រាជធានីភ្នំពេញនាយប់ថ្ងៃទី២៩ មេសានេះ និងក្រោយសោយព្រះក្រយាព្រឹកព្រះអង្គ និងរាជបុត្រ រួចក៏បានយាងមាតុភូមិនិវត្តន៍វិញនាថ្ងៃត្រង់ ទី៣០ មេសាដែល៕