ភ្នំពេញ៖ សហគមន៍កសិកម្មទំនើប «ម្រេចមេមត់ត្បូងឃ្មុំ» ត្រូវបានដាក់ឱ្យដំណើរការជាផ្លូវការ ដោយមានសមាជិក ៤៩គ្រួសារចូលរួម និងមាន ៦៧ចម្ការ ជាមួយនឹងទុនវិនិយោគប្រមាណ ១លានដុល្លារ។ នេះបើតាមការឱ្យដឹងពីឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម។

ការចងក្រងជាសហគមន៍កសិកម្មទំនើប «ម្រេចមេមត់ត្បូងឃ្មុំ» នេះ ក្នុងដំណាក់កាលដំបូង កសិករអាចសន្សំសំចៃប្រហែល២០% ពីការចំណាយទិញជីសរីរាង្គរួមគ្នា បើធៀបនឹងថ្លៃដើមដែលសមាជិកនីមួយៗធ្លាប់ទិញរៀងខ្លួន។ ឯកឧត្តម ឃឹម ហ្វីណង់ បានលើកឡើងថា ផ្ទៃដីផលិតកម្មក្នុងសហគមន៍ទំនើប មាន ៨០ហិកតា ដោយមាន ១២,៥ម៉ឺនជន្លង់ និងការធ្វើទីផ្សារផលិតកម្មកសិកម្មតាមកិច្ចសន្យា។

«សហគមន៍កសិកម្មទំនើប» គឺជាចក្ខុវិស័យនៃការអនុវត្តផលិតកម្មកសិកម្មរួមគ្នាទ្រង់ទ្រាយធំក្នុងវិស័យកសិកម្ម ដែលជាផ្នែកមួយនៃកម្មវិធីគោលនយោបាយអាទិភាពទី៦ របស់រាជរដ្ឋាភិបាលនីតិកាលទី៧ នៃរដ្ឋសភា និងបានដាក់ឱ្យអនុវត្តក្នុងឆ្នាំ២០២៣។ ឯកឧត្តម ឃឹម ហ្វីណង់ មានប្រសាសន៍ថា កសិករនឹងទទួលបានអត្ថប្រយោជន៍ ពីការចងក្រងជាសហគមន៍កសិកម្មទំនើប រួមមាន៖ ដំណោះស្រាយបញ្ហាខ្វះទុន ខ្វះបច្ចេកទេស ខ្វះទីផ្សារ ថ្លៃដើមផលិតខ្ពស់ ផលប៉ះពាល់ពីការប្រែប្រួលអាកាសធាតុ និងអនុញ្ញាតឱ្យកសិករជាសមាជិកសល់ពេលវេលាបង្កើនប្រាក់ចំណូលផ្សេងៗបន្ថែមទៀត៕