ភ្នំពេញ៖ ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ សង្ឃឹមថា ក្រសួងកសិកម្ម នឹងអាចសហការលើផ្នែកណាមួយជាមួយក្រុមហ៊ុន Heilongjang Province Maiku Information Technology Co.,Ltd របស់ចិននាថ្ងៃអនាគត ដើម្បីជួយអភិវឌ្ឍន៍វិស័យកសិកម្មបែបទំនើប។ នេះបើតាមការចុះផ្សាយរបស់ក្រសួងកសិកម្ម នាថ្ងៃទី៨ ខែធ្នូ ឆ្នាំ២០២៤។

ឯកឧត្តម សៀក ឡេង បានលើកឡើងថា ការសហការជាមួយក្រុមហ៊ុនចិន នឹងជួយវិស័យកសិកម្មបែបទំនើប តាមរយៈប្រព័ន្ធគ្រប់គ្រងព័ត៌មាន និងទិន្នន័យកសិកម្មលើការប្រើប្រាស់បច្ចេកវិទ្យាឌីជីថល ដើម្បីព្យាករ វិភាគដី ទិន្នផល ឬហានិភ័យដូចជាសត្វល្អិត និងអាកាសធាតុ ដោយប្រើប្រាស់រូបភាព និងទិន្នន័យផ្កាយរណប។

ឯកឧត្តមអនុរដ្ឋលេខាធិការក្រសួងកសិកម្ម បានបន្តថា ប្រព័ន្ធនេះ គឺជាប្រព័ន្ធល្អ ទំនើប និងគ្រប់ជ្រុងជ្រោយ ដែលអាចគ្រប់គ្រងព័ត៌មានកសិកម្មបានច្រើនតាមរយៈការប្រើប្រាស់បច្ចេកវិទ្យាថ្មី និងរូបភាពផ្កាយរណបផងដែរ៕