ភ្នំពេញ៖ រមណីយដ្ឋានបឹងស្នោ ជាកន្លែងដ៏ទាក់ទាញភ្ញៀវទេសចរ ឱ្យមកអង្គុយលំហែ មើលថ្ងៃលិច និងទស្សនាហ្វូងបក្សីជាច្រើន នៅខេត្តឧត្តរមានជ័យ។ ជារៀងរាល់ឆ្នាំ បឹងនេះជាកន្លែងដ៏សំខាន់ក្នុងការរៀបចំពិធីបុណ្យអុំទូក ដើម្បីទាក់ទាញភ្ញៀវទេសចរមកទស្សនា និងស្នាក់នៅកាន់តែច្រើន។

យោងតាមក្រសួងទេសចរណ៍ដែលបានចុះផ្សាយតាមទំព័រហ្វេសប៊ុករបស់ខ្លួន កាលទី០៣ ខែវិច្ឆិកា ឆ្នាំ២០២៣ រមណីយដ្ឋានបឹងស្នោនេះ មានទំហំ១៤០០ម៉ែត្រ x ៩១០,៩ម៉ែត្រ ដែលស្ថិតនៅភូមិឈូក សង្កាត់សំរោង ក្រុងសំរោង ខេត្តឧត្តរមានជ័យ។ មិនតែប៉ុណ្ណោះ អាជ្ញាធរខេត្ត និងប្រជាពលរដ្ឋ បានជីកបឹងឱ្យជ្រៅ ដើម្បីរក្សាទឹកទុកនៅរដូវប្រាំង ហើយដាំដើមឈើព័ទ្ធជុំវិញបឹងឱ្យមានខ្យល់អាកាសបរិសុទ្ធ និងតុបតែងលម្អដាក់រូបចម្លាក់ជាច្រើនដូចជា ដំរី សេះ ហង្ស នាគ ក្ងោកជាដើម។

តាមប្រវត្តិរមណីយដ្ឋានបឹងស្នោ ប្រជាជននៅតំបន់នោះ និយាយតៗគ្នាថា កាលពីដើមឡើយបឹងនេះមានដើមស្នោដុះយ៉ាងច្រើនសន្ធឹកសន្ធាប់នៅផ្នែកខាងជើងនិងខាងកើត។ ម្យ៉ាងវិញទៀត នៅចំកណ្ដាលបឹងសម្បូរទៅដោយដើមកក់ ដើមភ្លង់ និងដើមឈូក អាចផ្ដល់ជម្រកដល់ពពួកមច្ឆា និងសត្វស្លាបជាច្រើនប្រភេទដូចជា ទោម ប្រវឹក កុកជាដើម៕