ភ្នំពេញ៖ ការការពារកុមារតាមអ៊ីនធឺណិត គឺជារឿងសំខាន់ក្នុងយុគសម័យឌីជីថលនាពេលបច្ចុប្បន្ននេះ។ កម្ពុជាឆ្ពោះទៅឌីជីថល បានបង្ហាញពីវិធីដ៏មានប្រសិទ្ធភាពមួយចំនួនដល់ឪពុកម្តាយ ឬអាណាព្យាបាលដើម្បីធានាសុវត្ថិភាពរបស់កុមារ ដូចខាងក្រោម៖

១. និយាយដោយបើកចំហជាមួយកុមារអំពីសកម្មភាពតាមអនឡាញ លើកទឹកចិត្តកុមារ ឱ្យចែករំលែកបទពិសោធ ការកង្វល់ និងពិភាក្សាអំពីមនុស្សទាំងឡាយណា ដែលពួកគេកំពុងទាក់ទងតាមអនឡាញ ដើម្បីចៀសវាងហានិភ័យ។ ២. កំណត់វិន័យ និងទម្លាប់៖ បង្កើតគោលការណ៍ណែនាំឱ្យបានច្បាស់លាស់ក្នុងការប្រើប្រាស់អ៊ីនធឺណិត កំណត់ពេលវេលា និងអាកប្បកិរិយា ដែលគួរបង្ហាញ។ លើសពីនេះទៅទៀត ត្រូវប្រាកដថាកុមារ បានយល់ច្បាស់ពីហេតុផលទាំងអស់នេះ។

៣. ធ្វើជាគំរូល្អ៖ ក្មេងៗធ្វើត្រាប់តាមសកម្មភាពរបស់ឪពុកម្តាយ ដូច្នេះការបង្ហាញអំពីសកម្មភាពវិជ្ជមានល្អៗមួយចំនួន និងរបៀបប្រើប្រាស់អ៊ីនធឺណិតប្រកបដោយទំនួលខុសត្រូវ។ ៤. ជំរុញគំនិតច្នៃប្រឌិត៖ អនុញ្ញាតឱ្យកុមាររកអ្វីដែលជាចំណង់ចំណូលចិត្តនៅលើអនឡាញ និងឪពុកម្តាយដើរតួជាអ្នកប្រឹក្សាយោបល់អំពីការចូលចិត្តរបស់ពួកគេ ប្រកបដោយភាពច្បាស់លាស់ និងរក្សាតុល្យភាព។

៥. ការកំណត់ឯកជនភាព និងសុវត្ថិភាព៖ ត្រូវប្រាកដថាកុមារ ប្រើការកំណត់ឯកជនភាពនៅលើប្រព័ន្ធផ្សព្វផ្សាយសង្គម ដាក់មុខងារការចាក់សោរ ២ជាន់ និងមុខងារសុវត្ថិភាពផ្សេងៗទៀត ដើម្បីការពារព័ត៌មានផ្ទាល់ខ្លួនរបស់ពួកគេ។ ការធ្វើបច្ចុប្បន្នភាពទៅលើឧបករណ៍ឌីជីថល និងប្រើប្រាស់មុខងារគ្រប់គ្រងដោយមាតាបិតា (Parent Control ) គឺជាការចាំបាច់។ ៦.ចំណាយពេលជាមួយកុមារ និងអប់រំពីការបោកប្រាស់ផ្សេងៗ៖ ជ្រើសរើសមាតិកាណាដែលល្អ និងមានប្រយោជន៍ ដើម្បីបង្រៀនកុមារអំពីគ្រោះថ្នាក់ដែលអាចកើតមាននៅលើអ៊ីនធឺណិត ដូចជាការគំរាមកំហែងតាមអ៊ីនធឺណិត ការបន្លំ និងការបោកប្រាស់ជាដើម៕