ភ្នំពេញ៖ កម្មវិធីបរិវត្តកម្មឌីជីថលសហគ្រាស បើកវគ្គចាប់យកឌីជីថលស្តីពី «ការចាប់ផ្តើមដំណើរបរិវត្តកម្មឌីជីថលសហគ្រាស» ជំនាន់ទី៤ ដែលផ្តោតលម្អិតលើ «ការធ្វើទីផ្សារតាមបែបឌីជីថល» ដើម្បីបង្កើនការយល់ដឹងដល់សហគ្រាសគ្រប់កម្រិត ពិសេសសហគ្រាសធុនមីក្រូ តូច និងមធ្យម (MSMEs) ពីតួនាទី និង សារសំខាន់នៃការធ្វើទីផ្សារឌីជីថលនៅក្នុងបរិបទអាជីវកម្មទំនើប។

វគ្គបណ្តុះបណ្តាលនេះ នឹងត្រូវបានរៀបចំតាមរយៈអនឡាញ (Microsoft Team) ដោយបែងចែកសិក្ខាកាមចូលរួមជា ២ក្រុម ដោយក្រុមទី១ នឹងបណ្តុះបណ្តាលក្នុងខែវិច្ឆិកា និងក្រុមទី២ នៅក្នុងខែធ្នូ ឆ្នាំ២០២៤។ នេះបើតាមការចុះផ្សាយរបស់កម្មវិធីបរិវត្តកម្មឌីជីថលសហគ្រាស កាលពីថ្ងៃទី១៨ ខែតុលា ឆ្នាំ២០២៤។

សហគ្រាស ដែលចង់ចូលរួមក្នុងវគ្គសិក្សារៀបចំដោយក្រសួងសេដ្ឋកិច្ច និងហិរញ្ញវត្ថុ, មជ្ឈមណ្ឌលបណ្ដុះធុរកិច្ចថ្មី «តេជោ», កម្មវិធីបរិវត្តកម្មឌីជីថលសហគ្រាស និងគាំទ្រដោយថវិកាមូលនិធិអភិវឌ្ឍន៍ជំនាញ អាចចុះឈ្មោះចូលស្នើសុំតាម QR Code ចាប់ពីថ្ងៃទី១៨ តុលា ដល់ថ្ងៃទី១៨ វិច្ឆិកា ឆ្នាំ២០២៤ (សម្រាប់ក្រុមទី១) និងថ្ងៃទី១៩ វិច្ឆិកា ដល់ថ្ងៃទី៤ ធ្នូ ឆ្នាំ២០២៤ (ក្រុមទី២)។ សម្រាប់ព័ត៌មានបន្ថែម អាចចូលទៅកាន់គេហទំព័រ និងបណ្ដាញសង្គម៖ https://shorturl.at/ZY4CA៕