ភ្នំពេញ៖ ក្រុមហ៊ុន Cambodia Angkor Air គ្រោងបង្កើន និងបន្ថែមជើងហោះហើរត្រង់ទីក្រុងធំនានាៗ នៅប្រទេសចិន និងជើងហោះហើរក្នុងស្រុក ដើម្បីរួមចំណែកអភិវឌ្ឍន៍វិស័យទេសចរណ៍ តាមរយៈការផ្តល់នូវភាពងាយស្រួលក្នុងការធ្វើដំណើរដល់ភ្ញៀវទេសចរបរទេស និងចិនមកទស្សនានៅកម្ពុជា។ នេះជាការលើកឡើងរបស់លោកបណ្ឌិត Zhan David នាយកប្រតិបត្តិ និងជាតំណាងក្រុមហ៊ុន Cambodia Angkor Air។

ក្នុងជំនួបជាមួយឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ លោកបណ្ឌិត Zhan David ក៏បានស្នើសុំប្រគល់យន្តហោះថ្មីមួយគ្រឿង ក្នុងចំណោមយន្តហោះចំនួន៥គ្រឿងដែលក្រុមហ៊ុន នឹងទិញជូនក្រសួងទេសចរណ៍ ដោយប្រសិទ្ធិនាម និងដាក់ស្លាកផ្សាយពាណិជ្ជកម្មលើតួយន្តហោះ ដែលក្នុងនោះក្រសួង ក៏បានឯកភាពតាមសំណើបស់ក្រុមហ៊ុនផងដែរ។

នាឱកាសនោះ លោកបណ្ឌិត Zhan David ក៏បានសន្យាបន្តផ្សព្វផ្សាយពីសក្តានុពលទេសចរណ៍របស់កម្ពុជាដល់ប្រជាជនចិនឱ្យបានទូលំទូលាយ និងរៀបចំវេទិកាជំនួបធុរកិច្ចរវាងវិនិយោគិនចិន ដើម្បីទាក់ទាញឱ្យមកវិនិយោគបន្ថែមនៅកម្ពុជាផងដែរ។ ក្នុងកិច្ចពិភាក្សានាថ្ងៃទី១៦ ខែតុលា ឆ្នាំ២០២៤ នេះ លោកបណ្ឌិត Zhan David ក៏បានលើកឡើងអំពីស្ថានភាពអាជីវកម្មក្រុមហ៊ុន និងបញ្ហាប្រឈមទៀតផង៕