ភ្នំពេញ៖ កម្ពុជា និងថៃ បានឯកភាពពង្រឹង និងពង្រីកកិច្ចសហប្រតិបត្តិការទ្វេភាគី ដោយផ្តោតទៅលើការបង្កើតតំបន់សេដ្ឋកិច្ចពិសេសបំពេញគ្នាទៅវិញទៅមក ការតភ្ជាប់រវាងប្រជាជននិងប្រជាជន វិស័យទេសចរណ៍ ការពារជាតិ និងសន្តិសុខ។ កិច្ចពិភាក្សានេះ បានប្រព្រឹត្តឡើងរវាងសម្តេចធិបតី ហ៊ុន ម៉ាណែត និងលោកជំទាវ ផេថងថាន ស៊ីណាវ៉ាត់ត្រា នាយករដ្ឋមន្ត្រីថៃ។

ក្នុងអំឡុងពេលនៃការប្រជុំកំពូលអាស៊ាន លើកទី៤៤ និង៤៥ នៅរដ្ឋធានីវៀងចន្ទន៍ ប្រទេសឡាវ កាលពីថ្ងៃទី៩ ខែតុលា ឆ្នាំ២០២៤ ភាគីទាំងពីរ ក៏បានព្រមព្រៀងបន្តពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែខ្លាំង។ កម្ពុជា និងថៃ ក៏បានឱ្យក្រសួងការបរទេសនៃប្រទេសទាំងពីរ សម្របសម្រួលកិច្ចពិភាក្សាពាក់ព័ន្ធនឹងកិច្ចសហការខាងលើ និងរៀបចំឱ្យមានសកម្មភាពមួយចំនួន ដើម្បីអបអរសាទរខួបលើកទី ៧៥ នៃទំនាក់ទំនងការទូតកម្ពុជា-ថៃ នាឆ្នាំ២០២៥ ផងដែរ។

លោកជំទាវ ផេថងថាន ស៊ីណាវ៉ាត់ត្រា បានលើកឡើងថា ទំនាក់ទំនងកម្ពុជា និងថៃ កំពុងរីកចម្រើនយ៉ាងល្អ បន្ទាប់ពីដំណើរទស្សនកិច្ចផ្លូវការរបស់សម្តេចធិបតីនាយករដ្ឋមន្រ្តី កាលពីខែកុម្ភៈ ឆ្នាំ២០២៤។ ក្នុងកិច្ចពិភាក្សាខាងលើនេះ សម្តេចធិបតី ហ៊ុន ម៉ាណែត ក៏បានវាយតម្លៃខ្ពស់ចំពោះកិច្ចសហប្រតិបត្តិការទ្វេភាគី ដែលត្រូវបានបង្កើតឡើងដល់កម្រិតដៃគូយុទ្ធសាស្រ្តនៅឆ្នាំ២០២៤នេះ៕