ភ្នំពេញ៖ ក្រសួងរតនាគារសហរដ្ឋអាម៉េរិក ស្វែងរកលទ្ធភាពបន្តកិច្ចសហប្រតិបត្តិការលើក្របខ័ណ្ឌផ្តល់ជំនួយបច្ចេកទេសទៅតាមតម្រូវការជាក់លាក់ ដើម្បីអភិវឌ្ឍន៍ប្រព័ន្ធធនាគារនៅកម្ពុជា។ នេះជាការលើកឡើងរបស់លោក Robert Kaproth ដែលបានដឹកនាំប្រតិភូក្រសួងរតនាគារសហរដ្ឋអាម៉េរិក។

ក្នុងជំនួបជាមួយលោក Robert Kaproth លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអរគុណដល់ការស្វែងរកលទ្ធភាពបន្តជំនួយបច្ចេកទេសរបស់សហរដ្ឋអាម៉េរិក ក្នុងការអភិវឌ្ឍប្រព័ន្ធធនាគារនៅកម្ពុជា។ ជាមួយគ្នានេះ លោកជំទាវបណ្ឌិត ជា សិរី ក៏បានលើកឡើងអំពីសកម្មភាពក្នុងការលើកកម្ពស់ការប្រើប្រាស់ប្រាក់រៀល ដើម្បីគាំទ្រដល់ដំណើរការអនុវត្តន៍គោលនយោបាយរូបិយវត្ថុឱ្យកាន់តែមានប្រសិទ្ធភាព។

ក្នុងជំនួបនាថ្ងៃទី៧ ខែតុលា ឆ្នាំ២០២៤ នេះ លោក Robert Kaproth ក៏បានបង្ហាញអំពីវឌ្ឍនភាពនៃការធ្វើបដិដុល្លារូបនីយកម្មនៅកម្ពុជាផងដែរ ដែលក្នុងនោះ លោកជំទាវបណ្ឌិត ជា សិរី ក៏បានលើកឡើងពីការវិនិយោគទុនបម្រុងអន្តរជាតិមួយផ្នែករបស់ធនាគារជាតិនៃកម្ពុជា លើសញ្ញាប័ណ្ណបៃតងទៀតផង។

តាមការចុះផ្សាយរបស់ធនាគារជាតិនៃកម្ពុជា នាថ្ងៃទី០៨ តុលា ក្នុងជំនួបខាងលើនេះ ភាគីទាំងពីរបានពិភាក្សាអំពីប្រធានបទមួយចំនួនពាក់ព័ន្ធនឹងស្ថានភាពសេដ្ឋកិច្ច និងប្រព័ន្ធហិរញ្ញវត្ថុនៅកម្ពុជា រួមទាំងវឌ្ឍនភាព និងប្រសិទ្ធភាពនៃជំនួយបច្ចេកទេសសម្រាប់អភិវឌ្ឍន៍ប្រព័ន្ធហិរញ្ញវត្ថុកម្ពុជានាពេលកន្លងមក៕