ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យក្រុមហ៊ុន សិលា ផិបភើរ ខូអិលធីឌី បន្ថែមការអភិវឌ្ឍ ដោយផ្តោតលើគុណភាពល្អ ប្រណិត មានស្តង់ដារខ្ពស់ ជួយកសិករនៅផ្នែកកែច្នៃ និងនាំចេញទៅទីផ្សារ ធ្វើឱ្យមានខ្សែច្រវាក់តម្លៃ មានភាពល្អប្រសើរ ផ្ដោតលើគុណភាព ជាជាងប្រកួតប្រជែងលើបរិមាណ។

ក្នុងជំនួបជាមួយក្រុមហ៊ុន សិលា ផិបភើរ នាថ្ងៃទី១៨ ខែកញ្ញា ឆ្នាំ២០២៤ ឯកឧត្តម ឌិត ទីណា ក៏បានលើកទឹកចិត្តឱ្យក្រុមហ៊ុន សហការជាមួយសាជីវកម្មធានាឥណទានកម្ពុជា(CGCC) ដើម្បីអាចទទួលបានលទ្ធភាពក្នុងការផ្តល់កម្ចី ដោយឆ្លងកាត់ការគិតគូរនិងការវាយតម្លៃច្បាស់លាស់ ព្រមទាំងមានលទ្ធភាពសងត្រឡប់ និងទទួលបានកម្ចីដែលមានអត្រាការប្រាក់ទាប។

ឯកឧត្តម ឌិត ទីណា ក៏ជំរុញឱ្យក្រុមហ៊ុនអាចពិចារណាសហការជាមួយសហគមន៍កសិកម្មទំនើប ដែលអាចផលិតទៅតាមតម្រូវការរបស់ក្រុមហ៊ុន ដែលមានគុណភាពល្អ មានធនធានគ្រប់គ្រាន់សម្រាប់ផលិតកម្ម មានប្រសិទ្ធភាពសេដ្ឋកិច្ច ទទួលបានការវិនិយោគ និងចែករំលែកផលចំណេញ។ លើសពីនេះ រដ្ឋមន្ត្រីក្រសួងកសិកម្ម បានគូសបញ្ជាក់ថា វិស័យកសិកម្មត្រូវការ ការចូលរួមពីវិស័យឯកជន និងក្រុមហ៊ុន លើកកម្ពស់ការអនុវត្តកសិកម្មតាមកិច្ចសន្យា (Contract Farming) ផលិតកសិផលមានគុណភាព និងមានតម្លៃបន្ថែមខ្ពស់៕