ភ្នំពេញ៖ ជប៉ុន សម្រេចផ្តល់ឥណទានសម្បទានប្រាក់យ៉េនសរុប ៧,៩៨៨លានយ៉េន ស្មើនឹងប្រមាណ ៥៥លានដុល្លារ ឱ្យកម្ពុជាអនុវត្ត «គម្រោងពង្រីកប្រព័ន្ធខ្សែបញ្ជូន និងចែកចាយក្នុងរាជធានីភ្នំពេញ (ដំណាក់កាលទី២)»។ លិខិតប្តូរសារ និងឯកសារពាក់ព័ន្ធលើកម្ចីនេះ ត្រូវបានចុះហត្ថលេខាព្រមព្រៀង កាលពីថ្ងៃទី៦ ខែកញ្ញា ឆ្នាំ២០២៤ នៅទីស្តីការក្រសួងការបរទេស។

ការចុះហត្ថលេខា ធ្វើឡើងរវាង ឯកឧត្តម ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកឧត្តម អឺអិណុ អាស៊ីស៊ី (UENO Atsushi) ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន ប្រចាំកម្ពុជា។ ពាក់ព័ន្ធនឹងគម្រោងនេះ រដ្ឋាភិបាលជប៉ុន នឹងបន្តរួមចំណែកផ្គត់ផ្គង់អគ្គិសនីប្រកបដោយស្ថិរភាព ក្នុងរាជធានីភ្នំពេញ។

ការផ្តល់ឥណទានសម្បទានខាងលើ បង្ហាញពីការប្តេជ្ញាចិត្តរបស់ជប៉ុន លើការជួយដល់កិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលកម្ពុជា ក្នុងការលើកកម្ពស់ការអភិវឌ្ឍសេដ្ឋកិច្ច និងសង្គម។ តាមសេចក្តីប្រកាសព័ត៌មានរបស់ក្រសួងការបរទេស ការផ្តល់ឥណទានសម្បទាននេះ ក៏នឹងជួយពង្រឹងបន្ថែមទៀតនូវ «ភាពជាដៃគូយុទ្ធសាស្ត្រគ្រប់ជ្រុងជ្រោយ» រវាងកម្ពុជា-ជប៉ុនផងដែរ៕