ភ្នំពេញ៖ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានណែនាំឱ្យមន្ទីរខេត្តក្រចេះ ពិនិត្យលទ្ធភាពចងក្រងសិប្បកម្មផលិតស្រាអង្ករខ្នាតតូចជាង ៧០០មូលដ្ឋានទៅជាសហគមន៍អ្នកផលិតស្រាអង្ករ ដើម្បីអនុវត្តតាមស្តង់ដារជាតិស្តីពីស្រាអង្ករ។ ឯកឧត្តម ហែម វណ្ណឌី បានបន្តថា ការអនុវត្តតាមស្តង់ដារជាតិនេះ នឹងធ្វើឱ្យស្រាអង្ករកម្ពុជា អាចបង្កើនភាពប្រកួតប្រជែងទាំងនៅទីផ្សារក្នុងស្រុក និងទីផ្សារអន្តរជាតិ។

ក្នុងកិច្ចពិភាក្សាការងារជាមួយមន្ទីរឧស្សាហកម្ម ខេត្តស្ទឹងត្រែង និងខេត្តក្រចេះ នាថ្ងៃទី៣ ខែកញ្ញា ឆ្នាំ២០២៤ រដ្ឋមន្រ្តីក្រសួងឧស្សាហកម្ម បានបញ្ជាក់ថា ការចងក្រងសិប្បកម្មផលិតស្រាជាសហគមន៍អ្នកផលិតស្រាអង្ករបែបនេះ នឹងជាកាតាលីករដែលគាំទ្រដល់កសិករ និងលើកកម្ពស់ដល់ការកែច្នៃកាកសំណល់បង្កើតតម្លៃបន្ថែមជាដើម។ ជាមួយគ្នានេះ ឯកឧត្តម ហែម វណ្ណឌី បានជំរុញឱ្យមន្ទីរក្នុងខេត្តទាំងពីរឱ្យផ្តោតការគាំទ្រលើកាតាលីករទីផ្សារ ដែលផ្តល់សេវាកាន់តែប្រសើរ ដើម្បីឈានចូលទីផ្សារតំបន់ និងអន្តរជាតិ ព្រោះខេត្តទាំងពីរ ស្ថិតនៅជាប់ដងទន្លេមេគង្គ ដែលមានធនធានជលផល និងកសិផលដ៏សម្បូរបែប។

ឯកឧត្តមរដ្ឋមន្រ្តីក្រសួងឧស្សាហកម្ម បានបន្ថែមថា ក្រសួង កំពុងពិនិត្យកែសម្រួលគោលនយោបាយ ដើម្បីគាំទ្រកាតាលីករទីផ្សារឱ្យកាន់តែកាត់បន្ថយចំណាយផលិតកម្ម ក្នុងគោលដៅអាចជួយជ្រោមជ្រែងដល់អាជីវកម្មក្នុងស្រុកផ្សេងទៀត និងលើកកម្ពស់សេដ្ឋកិច្ចយ៉ាងទូលំទូលាយ៕