ភ្នំពេញ៖ ក្រសួងប្រៃសណីយ៍និងទូរគមនាគមន៍ បានដាក់ឱ្យដំណើរសាកល្បងម៉ាស៊ីន TranslateKh ជំនាន់ទី១ នៅលើវេបសាយ និងTranslateKH-bot នៅលើតេឡេក្រាម។ ម៉ាស៊ីនទាំងនេះ មានលទ្ធភាពអាចបកប្រែពាក្យ ឃ្លាប្រយោគ ឬអត្ថបទពីភាសាខ្មែរទៅភាសាអង់គ្លេស និងពីភាសាអង់គ្លេសទៅភាសាខ្មែរប្រកបដោយភាពត្រឹមត្រូវ។

ក្រសួងប្រៃសណីយ៍ បានអំពាវនាវដល់ថ្នាក់ដឹកនាំ មន្រ្តីរាជការ និងបុគ្គលិកទាំងអស់ ចូលរួមប្រើប្រាស់ម៉ាស៊ីន TranslateKh នៅលើវេបសាយ និងTranslateKH-bot នៅលើតេឡេក្រាម ដើម្បីផ្តល់យោបល់អំពីប្រសិទ្ធិភាពនៃការប្រើប្រាស់ម៉ាស៊ីនបកប្រែនេះ។ មតិយោបល់របស់ថ្នាក់ដឹកនាំ មន្រ្តីរាជការ និងបុគ្គលិកនឹងរួមចំណែកកែលម្អកម្មវិធីនេះឱ្យកាន់តែប្រសើរឡើង មុននឹងដាក់ជូនសាធារណជនប្រើប្រាស់ឱ្យបានទូលំទូលាយ។

ថ្នាក់ដឹកនាំ មន្រ្តីរាជការ និងបុគ្គលិកទាំងអស់ អាចស្គេន QR Code ដើម្បីចូលរួមប្រើប្រាស់កម្មទាំងពីរនេះចាប់ពីពេលនេះតទៅ។ នេះបើតាមសេចក្តីជូនដំណឹងរបស់ក្រសួងប្រៃសណីយ៍ ស្តីពីការដាក់ដំណើរការម៉ាស៊ីនបកប្រែ TranslateKh និង TranslateKH-bot ជំនាន់ទី១ ចុះផ្សាយនាថ្ងៃទី៣០ ខែសីហា ឆ្នាំ២០២៤៕