ភ្នំពេញ៖ ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានលើកឡើងថា ក្នុងកិច្ចសហប្រតិបត្តិការអភិវឌ្ឍន៍តំបន់ត្រីកោណ CLV ធ្វើនៅខេត្តស្ទឹងត្រែងទទួលបានគម្រោងជាច្រើនកំពុងកើតមាន ដូចជា៖ គម្រោងហេដ្ឋារចនាសម្ព័ន្ធ, គម្រោងកសាងអាងប្រព្រឹត្តិកម្ម, គម្រោងធ្វើទីលានចាក់សំរាម ដែលមានថវិកាជាង ៥លានដុល្លារ និងគម្រោងមួយចំនួនទៀត កើតចេញអំពីថវិកាជំនួយរបស់ធនាគារពិភពលោក និងប្រទេសជប៉ុន។

អភិបាលខេត្តស្ទឹងត្រែង បានបញ្ជាក់ប្រាប់សមាគមអ្នកនិពន្ធខ្មែរ នាថ្ងៃទី១៧ ខែសីហា ឆ្នាំ២០២៤ ថា៖ « តាំងពីឆ្នាំ១៩៩៩មក កម្ពុជាយើងបានចាប់ផ្តើមពិនិត្យ សិក្សា និងបានចុះហត្ថលេខាក្នុងគម្រោងកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម(CLV) ដែលជាកិច្ចសហប្រតិបត្តិការអភិវឌ្ឍន៍ប្រទេសរៀងៗខ្លួនដោយឈរនៅលើការងាររួម មិនមែនការអភិវឌ្ឍន៍ប្រទេសរួមគ្នានោះទេ»។

ឯកឧត្តម សរ សុពុត្រា បានលើកឡើងថា ព្រំប្រទល់របស់ប្រទេសនីមួយៗ គឺត្រូវបានកំណត់ដោយច្បាប់អន្តរជាតិ មិនមែនរាជរដ្ឋាភិបាលនៃប្រទេសណាមួយ អាចកាត់ឱ្យប្រទេសណាមួយនោះទេ។ ជាមួយគ្នានេះ ឯកឧត្តម សរ សុពុត្រា បានអំពាវនាវឱ្យសាធារណជនជឿជាក់ និងទុកចិត្តលើរាជរដ្ឋាភិបាលកម្ពុជាផងដែរ។

សូមអញ្ជើទស្សនាវីដេអូឃ្លីបខ្លី ដែល ឯកឧត្តម សរ សុពុត្រា ពន្យល់ដល់សមាគមអ្នកនិពន្ធខ្មែរ ក្នុងដំណើរទស្សនកិច្ចទស្សនកិច្ចសិក្សាទៅកាន់ខេត្តស្ទឹងត្រែង រតនគិរី ក្រចេះ និងមណ្ឌលគិរី រយៈពេល ៣ថ្ងៃ ចាប់ពីថ្ងៃទី១៦-១៨ ខែសីហា ឆ្នាំ២០២៤ តទៅ៖