ភ្នំពេញ៖ តំណាងភាគីកម្មករនិយោជិត បានស្នើសុំដំឡើងប្រាក់ឈ្នួលបន្ថែមចំនួន ១៤ដុល្លារ ខណៈដែលតំណាងភាគីនិយោជកស្នើសុំដំឡើងតែ ១ដុល្លារប៉ុណ្ណោះ លើប្រាក់ឈ្នួលបច្ចុប្បន្នដែលមានចំនួន ២០៤ដុល្លារ។ នេះបើតាមសេចក្តីប្រកាសព័ត៌មានរបស់ក្រសួងការងារ និងបណ្តុះបណ្តាលវិជ្ជាជីវៈ នាថ្ងៃទី២៩ ខែសីហា ឆ្នាំ២០២៤។

ក្នុងកិច្ចប្រជុំត្រីភាគីលើកទី២ របស់ក្រុមប្រឹក្សាជាតិប្រាក់ឈ្នួលអប្បបរមា ដែលបានបើកកិច្ចប្រជុំនាព្រឹកថ្ងៃទី២៩ សីហានេះ គឺដើម្បីពិភាក្សាអំពីប្រាក់ឈ្នួលអប្បបរមាលើផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ២០២៥ ខាងមុខ។

ក្នុងជំនួបពិភាក្សានេះ ភាគីទាំងពីរ នូវតែបន្តលើកហេតុផល និងបង្ហាញនូវគោលជំហរផ្ទៃក្នុងទៅវិញទៅមកប្រកបដោយវិជ្ជាជីវៈ និងសំណើរក្នុងការស្នើសុំដំឡើងប្រាក់ឈ្នួល។ យ៉ាងណាមិញ ជាលទ្ធផលអង្គប្រជុំ បានឯកភាពគ្នាកំណត់កិច្ចពិភាក្សាជាលក្ខណៈត្រីភាគីបន្តទៀត នៅម៉ោង ១០:០០នាទីព្រឹក នៅថ្ងៃទី៦ ខែកញ្ញា ឆ្នាំ២០២៤ ខាងមុខ៕