ភ្នំពេញ៖ ក្រសួងប្រៃសណីយ៍និងទូរគមនាគមន៍ជាក្រសួងជំនាញ ក្នុងដំណើរការរដ្ឋាភិបាលឌីជីថល ដែលមានតួនាទីទទួលបន្ទុកអភិវឌ្ឍន៍និងគ្រប់គ្រងហេដ្ឋារចនាសម្ព័ន្ធទូរគមនាគមន៍ និងបច្ចេកវិទ្យាគមនាគមន៍និងព័ត៌មាន សម្រាប់គាំទ្រដល់ដំណើរការបរិវត្តកម្មឌីជីថលនិងរដ្ឋាភិបាលឌីជីថល។ នេះបើតាមគោលនយោបាយរដ្ឋាភិបាលឌីជីថលកម្ពុជា ២០២២-២០៣៥។

ក្រសួងជំនាញ មានតួនាទីក្នុងដំណើរការបរិវត្តកម្មឌីជីថលនិងរដ្ឋាភិបាលឌីជីថល រួមមាន៖ ហេដ្ឋារចនាសម្ព័ន្ធទូរសព្ទចល័តនិងអចល័ត, ហេដ្ឋារចនាសម្ព័ន្ធអ៊ិនធឺណិត, ហេដ្ឋារចនាសម្ព័ន្ធបណ្តាញរដ្ឋាភិបាលឌីជីថល, ការរៀបចំមជ្ឈមណ្ឌលទិន្នន័យនិងប្រព័ន្ធក្លោដដែលមានលក្ខណៈសមាហរណកម្មស្របតាមអភិក្រមក្នុងទម្រង់ពាក់កណ្តាលវិមជ្ឈការ, ការកំណត់និយាម, ពិធីសារ, ស្តង់ដារនិងការគ្រប់គ្រងកិច្ចប្រតិបត្តិការហេដ្ឋារចនាសម្ព័ន្ធអត្តសញ្ញាណឌីជីថល និងមជ្ឈមណ្ឌលប្រតិបត្តិការសន្តិសុខរដ្ឋាភិបាលឌីជីថល។

បន្ថែមពីនេះ ក្រសួងជំនាញ មានភារកិច្ចរៀបចំនិងផ្តល់សេវាប្រព័ន្ធព័ត៌មានឌីជីថលទៅកាន់ក្រសួងស្ថាប័ននានា ជាអាទិ៍ប្រព័ន្ធ អ៊ីម៉ែលរួម, វិបផតថលជាតិ, ប្រព័ន្ធសហការរួម, ប្រព័ន្ធផ្ញើរសារ, ប្រព័ន្ធគ្រប់គ្រងឯកសារនិងផ្តល់ការអនុម័តអេឡិចត្រូនិក។ ក្រៅពីហេដ្ឋារចនាសម្ព័ន្ធនិងសេវាខាងលើ ក្រសួងប្រៃសណីយ៍ ត្រូវរៀបចំស្តង់ដារ, ធានានិរន្តភាព, ផ្តល់ការប្រឹក្សាយោបល់និងគាំទ្រដល់ក្រសួងស្ថាប័ន និងការបណ្តុះបណ្តាលជំនាញឌីជីថលសម្រាប់មន្រ្តីរាជការ ជាពិសេសមន្ត្រីជាន់ខ្ពស់ និងមន្រ្តីបង្គោលបច្ចេកទេសក្រសួងស្ថាប័ន ក្នុងគោលដៅជំរុញបរិវត្តកម្មឌីជីថល៕