ភ្នំពេញ៖ អគ្គនាយកដ្ឋានបច្ចេកវិទ្យា និងផ្សព្វផ្សាយអប់រំ អំពាវនាវឱ្យប្រជាពលរដ្ឋប្រុងប្រយ័ត្នក្រុមជនខិលខូចដែលបានក្លែងបន្លំអត្តសញ្ញាណរបស់បុគ្គលជាម្ចាស់អាជីវកម្មនៅតាមអនឡាញ ដើម្បីឆបោកប្រាក់ពីជនរងគ្រោះ តាមដំណាក់កាលចំនួន៤។ នេះបើតាមការចុះផ្សាយរបស់អគ្គនាយកដ្ឋានបច្ចេកវិទ្យា និងផ្សព្វផ្សាយអប់រំ នាថ្ងៃទី២៤ ខែសីហា ឆ្នាំ២០២៤។

ដំណាក់កាលចំនួន ៤ដែលក្រុមជនខិលខូចឆបោកអាជីវកម្មអនឡាញក្លែងក្លាយនោះ រួមមាន៖ ទី១. បង្កើតគណនី ឬផេកតាមបណ្តាញសង្គមនានា ដើម្បីរៀបចំគម្រោងឆបោកជនរងគ្រោះ, ទី២. ផ្សព្វផ្សាយលក់សេវាកម្ម ឬទំនិញក្លែងបន្លំនៅតាមប្រព័ន្ធអនឡាញ ដូចជា ក្លែងបន្លំរូបភាពម្ចាស់អាជីវកម្ម, យករូបភាពទំនិញទៅផ្សព្វផ្សាយលក់បន្ត និងក្លែងបន្លំរូបភាពវិចខ្ចប់ទំនិញជាដើម។ ចំពោះ ទី៣. លួងលោម និងឆបោកជនរងគ្រោះ ឱ្យផ្ទេរប្រាក់ចូលគណនីធនាគារទើបប្រគល់ទំនិញតាមក្រោយ និងក្លែងបន្លំរូបភាពវិក្កយបត្រទូទាត់ប្រាក់ និងទី៤. ក្រុមជនខិលខូច នឹងផ្តាច់ទំនាក់ទំនងជាមួយជនរងគ្រោះ បន្ទាប់ពីជនរងគ្រោះផ្ទេរប្រាក់រួចរាល់។

អគ្គនាយកដ្ឋានបច្ចេកវិទ្យា និងផ្សព្វផ្សាយអប់រំ ក៏បានលើកទឹកចិត្តឱ្យពលរដ្ឋត្រូវចេះត្រួតពិនិត្យគេហទំព័រលក់ទំនិញឱ្យបានច្បាស់លាស់ មុននឹងសម្រេចចិត្តបញ្ជារទិញ និងកុំទូទាត់ប្រាក់ជាមុន ប្រសិនមិនទាន់ទទួលបានទំនិញ។ ចំពោះ ប្រជាពលរដ្ឋ ដែលចាញ់បោកឧក្រិដ្ឋជនបច្ចេកវិទ្យា អាចមកដាក់ពាក្យបណ្តឹង ឬរាយការណ៍មកកាន់សមត្ថកិច្ចជំនាញ ដើម្បីចូលរួមទប់ស្កាត់បទល្មើសបច្ចេកវិទ្យា តាមរយៈសេចក្តីរាយការណ៍មកកាន់សមត្ថកិច្ចជំនាញ៕