ភ្នំពេញ៖ សម្តេចធិបតី ហ៊ុន ម៉ាណែត នឹងបង្កើតមូលនិធិកសាងហេដ្ឋារចនាសម្ព័ន្ធតាមព្រំដែន ដែលផ្តោតលើការយកចិត្តទុកដាក់ទៅលើការកសាងផ្លូវក្រវាត់ព្រំដែន តាមរយៈកៀរគរថវិកាបន្ថែម និងផ្ដល់ឱកាសឱ្យពលរដ្ឋទូទាំងប្រទេស បានចូលរួមដោយផ្ទាល់ជាមួយរាជរដ្ឋាភិបាល ក្នុងការកសាងហេដ្ឋារចនាសម្ព័ន្ធរូបវ័ន្ដនៅតាមបណ្ដោយព្រំដែន។

ពាក់ព័ន្ធនឹងមូលនិធិកសាងហេដ្ឋារចនាសម្ព័ន្ធតាមព្រំដែន សម្តេចធិបតីនាយករដ្ឋមន្រ្តី ក៏បានជំរុញក្នុងសេចក្ដីថ្លែងការណ៍បង្ហាញអំពីសមិទ្ធផលរយៈពេល១ឆ្នាំ របស់រាជរដ្ឋាភិបាលនីតិកាលទី៧ កាលពីថ្ងៃទី២២ ខែសីហា ឆ្នាំ២០២៤ ឱ្យពលរដ្ឋទាំងអស់ចូលរួមក្នុងមូលនិធិនេះ ដើម្បីរួមគ្នាកសាងផ្លូវក្រវាត់ព្រំដែន និងរួមគ្នាក្នុងការកសាងការពារបូរណភាពទឹកដី។ ការផ្ដួចផ្ដើមបង្កើតមូលនិធិកសាងហេដ្ឋារចនាសម្ព័ន្ធនេះ ក៏ដើម្បីឆ្លើយតបក្ដីកង្វល់របស់ប្រជាពលរដ្ឋអំពីការអភិវឌ្ឍខេត្តចំនួន៤ រួមមានខេត្តក្រចេះ, ស្ទឹងត្រែង, រតនគិរី និងខេត្តមណ្ឌលគិរីផងដែរ។

សម្តេចធិបតី ហ៊ុន ម៉ាណែត បានលើកឡើងថា រាជរដ្ឋាភិបាល បានដាក់ចេញកម្មវិធីនយោបាយ និងគំនិតផ្តួចផ្តើមដូចជា កម្មវិធីផ្ដល់ដីការពារព្រៃ ដើម្បីរួមគ្នាអភិវឌ្ឍន៍ដោយចីរភាព និងឱ្យពលរដ្ឋទៅរស់នៅកាន់តែច្រើននៅខេត្តភាគឦសាន និងការពង្រាយមន្ដ្រីបច្ចេកទេសកសិកម្មក្នុងឃុំទាំងអស់ ក្នុងខេត្តទាំង៤។ សម្តេចធិបតីនាយករដ្ឋមន្រ្តី សង្កត់ធ្ងន់ថា កម្មវិធីនយោបាយទាំងនេះ គឺសុទ្ធតែបង្កើតជាសហថាមពលដើម្បីអភិវឌ្ឍន៍ខេត្តភាគឦសានរបស់កម្ពុជា ពិសេសខេត្តទាំង៤ ដែលស្ថិតក្នុងតំបន់ត្រីកោណអភិវឌ្ឍន៍កម្ពុជា-ឡាវ វៀតណាម៕