ភ្នំពេញ៖ ប្រមុខរដ្ឋាភិបាលកម្ពុជា សម្តេចធិបតី ហ៊ុន ម៉ាណែត គាំទ្រនិងត្រៀមខ្លួនក្នុងការចូលអនុវត្តសកម្មភាពធំៗចំនួន៨ ដែលប្រធានាធិបតីចិន ស៊ី ជិនពីង ប្រកាសក្នុងសុន្ធរកថាបើកវេទិកាខ្សែក្រវាត់ និងផ្លូវលើកទី៣ (3' BRF)។ គំនិតផ្តួចផ្តើមខ្សែក្រវាត់ និងផ្លូវនេះ បានផ្ដល់អត្ថប្រយោជន៍ជាច្រើនដល់ប្រទេសកំពុងអភិវឌ្ឍ រួមទាំងកម្ពុជាផងដែរ។ ក្នុងនោះ រួមមានការអភិវឌ្ឍហេដ្ឋារចនាសម្ព័ន្ធ, ការវិនិយោគផ្ទាល់ពីបរទេស, កំណើនសេដ្ឋកិច្ច, ការធ្វើសមាហរណកម្មក្នុងតំបន់ និងសកលលោក, ការផ្លាស់ប្តូរប្រជាជននិងប្រជាជន។

ក្នុងសុន្ធរកថាបើកវេទិកាខ្សែក្រវាត់ និងផ្លូវលើកទី៣ របស់ប្រធានាធិបតីចិន ស៊ី ជិនពីង ក្រោមមូលបទនកិច្ចប្រជុំ«កិច្ចសហប្រតិបត្តិការខ្សែក្រវាត់ និងផ្លូវ ប្រកបដោយគុណភាពខ្ពស់៖ រួមគ្នាដើម្បី ការអភិវឌ្ឍ និងវិបុលភាពរួម» ដែលបានលើកឡើងនៅចំពោះមុខថ្នាក់ដឹកនាំកំពូលមកពីជាង១៤០ប្រទេស និងអង្គការប្រមាណ៣០ ចូលរួមនៅទីក្រុងប៉េកាំង ប្រទេសចិន កាលពីថ្ងៃទី១៨ តុលា ឆ្នាំ២០២៣ មានសកម្មភាពធំៗចំនួន៨ ។

សកម្មភាពដែលបានផ្ដល់អត្ថប្រយោជន៍ជាច្រើនដល់ប្រទេសដែលចូលរួមជាមួយនឹងគំនិតផ្តួចផ្តើមខ្សែក្រវាត់ និងផ្លូវរបស់ចិននោះ គឺការកសាងបណ្តាញតភ្ជាប់ពហុវិស័យខ្សែក្រវាត់ និងផ្លូវ, ការគាំទ្រសេដ្ឋកិច្ចពិភពលោកបើកចំហ, ការអនុវត្តកិច្ចសហប្រតិបត្តិការជាក់ស្ដែង, ការជំរុញការអភិវឌ្ឍបៃតង, ការជំរុញនវានុវត្តន៍ផ្នែកវិទ្យាសាស្ត្រ និងបច្ចេកវិទ្យា, ការគាំទ្រការផ្លាស់ប្តូរប្រជាជន និងប្រជាជន, ការលើកកម្ពស់កិច្ចសហប្រតិបត្តិការខ្សែក្រវាត់ និងផ្លូវ ដែលឈរលើមូលដ្ឋាននៃសុចរិតភាព និងការពង្រឹងការកសាងស្ថាប័នសម្រាប់កិច្ចសហប្រតិបត្តិការខ្សែក្រវាត់ និងផ្លូវ ជាលក្ខណៈអន្តរជាតិ៕