ភ្នំពេញ៖ សម្តេចធិបតី ហ៊ុន ម៉ាណែត ផ្តល់ថវិកាចំនួន ២០០លានរៀល ភេសជ្ជៈចំនួន ១ពាន់កេស និងលិខិតសរសើរមួយ ដែលនឹងទទួលបានផ្ទាល់ពីសម្តេចធិបតី ដល់ខេត្តចំនួន៦ ដែលគ្មានគ្រោះថ្នាក់ចរាចរណ៍នាឱកាសបុណ្យចូលឆ្នាំប្រពៃណីជាតិខ្មែរ។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី២៦ ខែមេសា ឆ្នាំ២០២៤។

ខេត្តចំនួន ៦ ដែលទទួលបានថវិកាចំនួន ២០០លានរៀល ភេសជ្ជៈចំនួន ១ពាន់កេស និងលិខិតសរសើរមួយដែលនឹងទទួលបានផ្ទាល់ពីសម្តេចធិបតី រួមមាន៖ ខេត្តព្រៃវែង ខេត្តកោះកុង ខេត្តកំពង់ឆ្នាំង ខេត្តប៉ៃលិន ខេត្តត្បូងឃ្មុំ និងខេត្តមណ្ឌលគិរី។

ក្នុងការចុះផ្សាយនេះ បានបញ្ជាក់ថា ការប្រគល់រង្វាន់ជូនរាជធានី-ខេត្តណាដែលគ្មានគ្រោះថ្នាក់ចរាចរណ៍នាឱកាសបុណ្យចូលឆ្នាំប្រពៃណីជាតិខ្មែរ ក្នុងគោលបំណងមិនចង់ឃើញមានគ្រោះថ្នាក់ចរាចរណ៍ និងជំរុញការប្រុងប្រយ័ត្ន ព្រមទាំងគោរពច្បាប់ចរាចរណ៍។ ជាមួយគ្នានេះ សម្តេចធិបតី ហ៊ុន ម៉ាណែត បានអំពាវនាវឱ្យប្រជាពលរដ្ឋចូលរួមគោរពច្បាប់ចរាចរណ៍ បើកបរដោយប្រុងប្រយ័ត្នខ្ពស់ និងប្រកបដោយការទទួលខុសត្រូវ ព្រមទាំងប្រកាន់ខ្ជាប់ការយោគយល់អធ្យាស្រ័យគ្នា៕