ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ និងអង្គការស្បៀង និងកសិកម្មនៃសហប្រជាជាតិ (FAO) មានបំណងសហការរៀបចំកម្មវិធីអភិវឌ្ឍន៍វិស័យកសិកម្មឱ្យកាន់តែរីកចម្រើន ដើម្បីផ្សារភ្ជាប់ការវិនិយោគទៅនឹងពាណិជ្ជកម្ម ប្រកបដោយភាពជាក់លាក់ និងមានប្រសិទ្ធភាព។ នេះបើតាមការចុះផ្សាយរបស់ក្រសួងកសិកម្ម កាលពីថ្ងៃទី១៤ ខែសីហា ឆ្នាំ២០២៤។

គំនិតផ្តួចផ្តើមខាងលើនេះ ធ្វើឡើងក្រោយតំណាងអង្គការស្បៀងធ្វើបទបង្ហាញពីស្តីពី Cambodia Agrifood Trade and Investment Forum ទៅកាន់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម កាលពីថ្ងៃទី១៤ ខែសីហា។ ពាក់ព័ន្ធនឹងកម្មវិធីអភិវឌ្ឍន៍វិស័យកសិកម្ម ឯកឧត្តម ឌិត ទីណា លើកឡើងថាជាកម្មវិធីគំរូមួយដែលមានទីផ្សារពិតប្រាកដ មានប្រសិទ្ធភាពនៃការវិនិយោគពេញលេញ និងតភ្ជាប់ខ្សែច្រវាក់ផលិតកម្មនិងតម្លៃក្នុងវិស័យកសិកម្ម និងវិស័យពាក់ព័ន្ធនានា។

ឯកឧត្តម ឌិត ទីណា បន្តថាការរៀបចំកម្មវិធីអភិវឌ្ឍន៍វិស័យកសិកម្ម ត្រូវមានផែនការច្បាស់លាស់ និងគិតគូឱ្យបានស៊ីជម្រៅផងដែរ។ ឯកឧត្តមរដ្ឋមន្ត្រីក្រសួងកសិកម្ម ក៏បានបញ្ជាក់ថា កសិផលកម្ពុជាមានសក្តានុពលនៅកម្រិតដាំដុះ ( Upstream ) ដែលត្រូវការអ្នកវិនិយោគលើការកែច្នៃ (Downstream) ប្រកបដោយគុណភាព និងមានតម្លៃបន្ថែមខ្ពស់សម្រាប់ទីផ្សារក្នុងស្រុក និងនាំចេញទៅទីផ្សារអន្តរជាតិដូចជា ស្រូវអង្ករ ស្វាយចន្ទី កៅស៊ូ និងផលិតផលជលផល៕