ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានស្នើឱ្យនិស្សិតជ័យលាភីអាហារូបករណ៍ទៅសិក្សានៅប្រទេសកូរ៉េ ជួយផ្សព្វផ្សាយឱ្យកម្ពុជា ដើម្បីទាក់ទាញភ្ញៀវទេសចរណ៍ និងអ្នកវិនិយោគ។ ការចូលរួមផ្សព្វផ្សាយពីភាពវិជ្ជមានរបស់កម្ពុជានៅលើឆាកអន្តរជាតិនេះ គឺជាមនសិការបញ្ញវន្តដែលអាចមានឱកាសជួយប្រជាពលរដ្ឋ និងសង្គមជាតិ។

នាពេលជួបជាមួយនិស្សិតជ័យលាភីអាហារូបករណ៍ទៅសិក្សានៅកូរ៉េទាំង ៤២នាក់ ដែលទទួលអាហារូបករណ៍ពីទីភ្នាក់ងារ KOICA និងរដ្ឋាភិបាលកូរ៉េ ឯកឧត្តម ហេង សួរ បានលើកឡើងថា ការទទួលបានអាហារូបករណ៍នេះ គឺជាឱកាសល្អមួយបន្ថែមទៀតក្នុងការកសាងសមត្ថភាព និងកសាងទំនាក់ទំនងជាមួយពលរដ្ឋនៃបណ្តាប្រទេសផ្សេងៗ។ ការកសាងនូវទំនាក់ទំនងទាំងនេះ គឺដើម្បីរឹតចំណងមិត្តភាព និងឱកាសផ្សេងៗបន្ថែមទៀតក្នុងការកសាងជីវិតសម្រាប់ពេលអនាគត។ នេះបើតាមការចុះផ្សាយរបស់ក្រសួងការងារ នាថ្ងៃទី១៤ ខែសីហា ឆ្នាំ២០២៤៕