ភ្នំពេញ៖ គម្រោងអាជីវកម្មអភិវឌ្ឍន៍លំនៅឋាន និងអគារសហកម្មសិទ្ធិចំនួន៦ កំពុងធ្វើអាជីវកម្មដោយគ្មានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ។ បើតាមការចុះផ្សាយរបស់និយ័តករអាជីវកម្មអចលនវត្ថុនិងបញ្ចាំ កាលពីថ្ងៃទី៨ ខែសីហា ឆ្នាំ២០២៤ ការប្រកបអាជីវកម្មខុសច្បាប់របស់គម្រោងទាំង៦នេះ អាចធ្វើឱ្យប៉ះពាល់ ឬខាតបង់ផលប្រយោជន៍របស់សាធារណជន។

គម្រោងទាំង ៦ខាងលើ រួមមាន៖ បុរី ហួតយាង មានទីតាំងស្ថិតនៅសង្កាត់ដង្កោ ខណ្ឌដង្កោ រាជធានីភ្នំពេញ,សំណង់ផ្ទះល្វែង តាំង ឆេងសុង ស្ថិតនៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ, Crown Towers Condo SenSok នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ និងលំនៅដ្ឋាន លាភ សំណាង ទីតាំងឃុំបែកចាន ស្រុកអង្គស្នួល ខេត្តកណ្តាល។ គម្រោង បុរី រមនា ស្ថិតនៅសង្កាត់គោករការ ខណ្ឌព្រែកព្នៅ រាជធានីភ្នំពេញ និងរំដួលវីឡា នៅសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

និយ័តករអាជីវកម្មអចលនវត្ថុ និងបញ្ចាំ អំពាវនាវឱ្យសាធារណជនទាំងអស់កុំចូលរួមធ្វើអាជីវកម្ម ឬពាក់ព័ន្ធជាមួយនឹងគម្រោងទាំង ៦ខាងលើ ដើម្បីជៀសវាងការប៉ះពាល់ ឬខាតបង់ប្រយោជន៍ណាមួយជាយថាហេតុ។ នេះបើតាមសេចក្តីជូនដំណឹង ស្តីពីការប្រកបអាជីវកម្មអភិវឌ្ឍន៍លំនៅឋាន និងអគារសហកម្មសិទ្ធិ ដោយគ្មានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ៕