ភ្នំពេញ៖ ក្រសួងពាណិជ្ជកម្ម បានដាក់បង្ហាញជាសាធារណៈនូវឯកសារពាក់ព័ន្ធនឹងគម្រោងអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម (CLV) រួមមានសេចក្តីថ្លែងការណ៍រួមកិច្ចប្រជុំកំពូលលើកទី១ ដល់លើកទី១១ និងកិច្ចព្រមព្រៀង ព្រមទាំងអនុស្សារណៈពាក់ព័ន្ធចំនួន៥ ដែលជាឯកសារក្របខ័ណ្ឌសម្រាប់អនុវត្តលើការអភិវឌ្ឍន៍សេដ្ឋកិច្ច-សង្គម ក្នុងតំបន់ CLV ។ នេះបើតាមសេចក្តីប្រកាសព័ត៌មានកាលពីថ្ងៃទី២ ខែសីហា ឆ្នាំ២០២៤ របស់ក្រសួងពាណិជ្ជកម្ម។

ការចុះផ្សាយឯកសារគម្រោង CLV តាមការណែនាំកាលពីថ្ងៃទី២៣ ខែកក្កដា របស់សម្តេចតេជោ ហ៊ុន សែន ប្រធានព្រឹទ្ធសភា និងជាអ្នកផ្តួចផ្តើមបង្កើតតំបន់ CLV នេះ ក្នុងគោលបំណងឱ្យសាធារណជនយល់ដឹងពីអត្ថន័យ ខ្លឹមសារ និងសារសំខាន់នៃការបង្កើតតំបន់ត្រី CLV នេះឡើង។ សាធារណជន អាចទាញយកឯកសារពាក់ព័ន្ធគម្រោង CLV ទាំងនេះ នៅលើគេហទំព័ររបស់ក្រសួងពាណិជ្ជកម្មតាមរយៈតំណ ភ្ជាប់ https://www.moc.gov.kh/document-category/official-document និងអាចស្កែនយកពី QR Code។

ក្រសួងពាណិជ្ជកម្ម រំពឹងថាឯកសារវឌ្ឍនភាពរបស់តំបន់CLV ដែលសម្រេចបានតាំងពីការបង្កើតដំបូងនាឆ្នាំ១៩៩៩ ដល់បច្ចុប្បន្ននេះ នឹងធ្វើឱ្យសាធារណជនស្វែងយល់បានច្បាស់អំពីអត្ថន័យ ខ្លឹមសារ និងអត្ថប្រយោជន៍នៃកិច្ចសហប្រតិបត្តិការ ដែលជួយដល់ការរីកចម្រើនសេដ្ឋកិច្ច-សង្គម និងរួមចំណែកលើកស្ទួយជីវភាពប្រជាជនក្នុងតំបន់CLV ឱ្យកាន់តែប្រសើរឡើង៕