ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានបើកកិច្ចប្រជុំពិនិត្យវឌ្ឍនភាពការងាររៀបចំប្រព័ន្ធបច្ចេកវិទ្យា ដើម្បីជំរុញការវិនិយោគ និងទាក់ទាញវិនិយោគិនពីបរទេសមកកម្ពុជា។ តាមការចុះផ្សាយរបស់ CDC កាលពីថ្ងៃទី២៤ ខែកក្កដា ឆ្នាំ២០២៤ កិច្ចប្រជុំនេះ ដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។

ពិនិត្យលើវឌ្ឍនភាពការងាររៀបចំប្រព័ន្ធបច្ចេកវិទ្យានេះ បានអភិវឌ្ឍន៍ឡើងដើម្បីជំរុញការអនុវត្តនីតិវិធីផ្ដល់សេវាសាធារណៈដោយប្រើប្រាស់ថ្នាលបច្ចេកវិទ្យា ក្នុងគោលបំណងពង្រឹងប្រសិទ្ធភាព តម្លាភាព កាត់បន្ថយពេលវេលា និងបង្កើនភាពងាយស្រួលលើការតាមដាន ការផ្ដល់សេវាសាធារណៈនានារបស់ក្រុមប្រឹក្សាអភិវឌ្ឍន៍កម្ពុជា។

ជាមួយគ្នានេះ ការអភិវឌ្ឍប្រព័ន្ធបច្ចេកវិទ្យានឹងបម្រើដល់ការទាក់ទាញវិនិយោគិនបរទេសរបស់ CDC គឺអនុវត្តតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្នុងនីតិកាលទី៧ នៃរដ្ឋសភា ដែលបានកំណត់យកបច្ចេកវិទ្យាឌីជីថល ជាអាទិភាពគន្លឹះទី៥ ដែលសំដៅលើការកសាងសេដ្ឋកិច្ច និងសង្គមឌីជីថលនៅកម្ពុជា និងជំរុញកំណើនសេដ្ឋកិច្ចជាតិ៕