ភ្នំពេញ៖ ធនាគារជាតិនៃកម្ពុជា និងធនាគារកណ្តាលទីម័រខាងកើត បានចុះអនុស្សរណៈយោគយល់ (MOU) លើប្រតិបត្តិការធនាគារកណ្តាល, ការតភ្ជាប់ការទូទាត់សងប្រាក់, នវានុវត្តន៍ហិរញ្ញវត្ថុឌីជីថល, ការត្រួតពិនិត្យធនាគារ, បរិយាបន្នហិរញ្ញវត្ថុ និងការអភិវឌ្ឍធនធានមនុស្ស។ កិច្ចសហការទាំងនេះ ធ្វើឡើងក្នុងគោលបំណងឱ្យមន្ត្រីជំនាញភាគីទាំងពីរ អាចចែករំលែកព័ត៌មាន ទិន្នន័យសេដ្ឋកិច្ចនិងហិរញ្ញវត្ថុ និងចំណេះដឹងការងារបច្ចេកទេស។

កិច្ចព្រមព្រៀងនេះ បានចុះហត្ថលេខាដោយ លោកជំទាវបណ្ឌិត ជា សិរី ទេសាភិបាលធនាគារជាតិ និងឯកឧត្តម Helder Lopes ទេសាភិបាលធនាគារកណ្តាលទីម័រខាងកើត កាលពីថ្ងៃទីថ្ងៃទី២២ ខែកក្កដា ឆ្នាំ២០២៤ ក្នុងកិច្ចប្រជុំទ្វេភាគី ស្តីពី កិច្ចសហប្រតិបត្តិការនិងការរឹតចំណងមិត្តភាពយ៉ាងជិតស្និតរវាងធនាគារទាំងពីរ។ ក្នុងកិច្ចប្រជុំទ្វេភាគី ដែលជាកិច្ចប្រជុំលើកដំបូងរវាងភាគីទាំងពីរ បានពិភាក្សាលើស្ថានភាពសេដ្ឋកិច្ច នយោបាយរូបិយវត្ថុ និងដំណើរការវិវត្តរបស់វិស័យធនាគារនៃប្រទេសទាំងពីរ ព្រមទាំងចែករំលែកបទពិសោធ និងយុទ្ធសាស្ត្រលើកកម្ពស់ការប្រើប្រាស់រូបិយវត្ថុជាតិ និងដុល្លារូបនីយកម្មផងដែរ។

ក្រៅពីការចុះ MOU ដែលធ្វើឡើងនៅសណ្ឋាគារសូហ្វីតែល ដើម្បីអភិវឌ្ឍន៍វិស័យធនាគារនៃប្រទេសទាំងពីរឱ្យកាន់តែរីកចម្រើន លោកជំទាវបណ្ឌិត ជា សិរី និងឯកឧត្តម Helder Lopes បានព្រមព្រៀងឱ្យមានកិច្ចប្រជុំជាប្រចាំឆ្នាំ និងប្តេជ្ញាបន្តពង្រឹងនិងពង្រីកកិច្ចសហប្រតិបត្តិការនេះឱ្យកាន់តែរឹងមាំនិងទទួលបានលទ្ធផលជាផ្លែផ្កា។ នេះបើតាមសេចក្តីប្រកាសព័ត៌មានរបស់ធនាគារជាតិ ដែលចុះផ្សាយកាលពីថ្ងៃ២២ ខែកក្កដា ឆ្នាំ២០២៤៕