ភ្នំពេញ៖ ក្រសួងពាណិជ្ជកម្ម លើកទឹកចិត្តដល់ពាណិជ្ជករ ផលិតករ ចូលរួម«ពិព័រណ៍ផលិតផលការពារម៉ាកសម្គាល់ភូមិសាស្រ្ដទំនិញ និងផលិតផលម្ហូបអាហារ និងកសិកម្មនាំចូលអន្តរជាតិ ជឹងចូវ ឆ្នាំ២០២៤» ក្រោមប្រធានបទ៖«តម្រូវការប្រើប្រាស់ថ្មី ចែករំលែកម្ហូបអាហារសកល» ដែលនឹងធ្វើនៅខេត្តហឺណាន ប្រទេសចិន ថ្ងៃទី១១-១៣ ខែតុលាខាងមុខ។

បើតាមសេចក្តីប្រកាសព័ត៌មានរបស់ក្រសួងពាណិជ្ជកម្ម កាលពីថ្ងៃទី២ ខែកក្កដា ព្រឹត្តិការណ៍ពិព័រណ៍ពាណិជ្ជកម្មកម្រិតអន្តរជាតិនេះ នឹងផ្តល់ឱកាសដល់សហគ្រាសផលិតម្ហូបអាហារ និងភេសជ្ជៈ ផលិតផលកសិកម្ម និងផលិតផលសម្គាល់ភូមិសាស្រ្តទំនិញ ផ្សព្វផ្សាយផលិតផលរបស់ខ្លួនឱ្យបានកាន់តែទូលំទូលាយលើទីផ្សារអន្តរជាតិ។ បន្ថែមពីនេះ សហគ្រាសដែលចូលក្នុងការតាំងពិព័រណ៍ខាងលើ ក៏មានឱកាសស្វែងរកដៃគូអាជីវកម្មថ្មីក្នុងទីផ្សារប្រទេសសចិនផងដែរ។

ការចូលរួមក្នុងព្រឹត្តិការណ៍តាំងពិព័រណ៍ ដែលរៀបចំដោយគណៈកម្មការ PGIE & CIFA នេះ តម្រូវឱ្យបង់ថ្លៃស្តង់តាមតម្លៃជាក់ស្តែងរបស់គណៈកម្មការរៀបចំ។ សម្រាប់ម្ចាស់អាជីវកម្ម ផលិតករ ឬ សាធារណជនដែលមានបំណងចូលរួមក្នុងពិព័រណ៍អាចទាក់ទងតាមរយៈ ភាគីរៀបចំកម្មពិធីនៅប្រទេសចិនដែលមានឈ្មោះ YANG Jianzhuang និង YAN Yaoyao ឬលេខទំនាក់ទំនង៖ +៨៦-១៣៩ ១៦៨ ៦០៣៩ / +៨៦-១៨២ ២១៤ ៣១៨២៥ និងអ៊ីម៉ែលៈ [email protected]

ឬក៏តាមរយៈក្រសួងពាណិជ្ជកម្មរបស់កម្ពុជា ដែលមានលេខទំនាក់ទំនង ០៨៧ ៧៥៥ ៥៥១ / ០៧៧ ៣៦១ ៨៣៦ និងអ៊ីមែល [email protected] / [email protected] ៕