ភ្នំពេញ៖ ប្រជាកសិករចំនួន ៤០គ្រួសារ ដែលប្រកបរបរដាំម្រេចនៅមេមត់ ដែលមានម្រេចជាង១០ ម៉ឺនជន្លង់ នៅខេត្តត្បូងឃ្មុំ កំពុងពិនិត្យលទ្ធភាពចងក្រងជាសហគមន៍កសិកម្មទំនើបមួយសម្រាប់ដំណាំម្រេចក្នុងពេលឆាប់ៗនេះ។ នេះបើតាមការចុះផ្សាយរបស់ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម នាថ្ងៃទី២២ ខែមិថុនា ឆ្នាំ២០២៤។

ឯកឧត្តម ឃឹម ហ្វីណង់ បានលើកឡើងថា កម្ពុជា ផលិតម្រេចបានជិត ២ម៉ឺនតោនក្នុងមួយឆ្នាំៗ ហើយដំណាំម្រេចនេះ ភាគច្រើនចេញពីខេត្តត្បូងឃ្មុំតែម្តង។ ប្រសិនប្រជាកសិករអ្នកដាំម្រេចនៅក្នុងមួយខេត្តត្បូងឃ្មុំនេះ រួមគ្នាជាសហគមន៍ដ៏ធំមួយ កម្លាំងមួយ និងទិសដៅតែមួយ ឯកឧត្តមអនុរដ្ឋលេខាធិការក្រសួងកសិកម្ម ជឿជាក់ថានឹងអាចគ្រប់គ្រងដំណាំដ៏មានសក្តានុពលនេះ ប្រកបដោយប្រសិទ្ធភាពសេដ្ឋកិច្ច គ្រប់គ្រងបានទាំងតម្លៃ និងទីផ្សារ ពិសេសអាចកែច្នៃនាំចេញពីកម្ពុជាដោយខ្លួនឯងប្រកបដោយភាពប្រកួតប្រជែង ដោយមិនចាំបាច់ពឹងផ្អែកលើប្រទេសដទៃឡើយ។

គួររំលឹកថា «សហគមន៍កសិកម្មទំនើប» គឺជាចក្ខុវិស័យនៃការអនុវត្តផលិតកម្មកសិកម្មរួមគ្នាទ្រង់ទ្រាយធំក្នុងវិស័យកសិកម្ម ដែលជាផ្នែកមួយនៃកម្មវិធីគោលនយោបាយអាទិភាពទី៦ របស់រាជរដ្ឋាភិបាលនីតិកាលទី៧ នៃរដ្ឋសភា និងបានដាក់ឱ្យអនុវត្តក្នុងឆ្នាំ២០២៣។ លក្ខណៈពិសេសរបស់សហគមន៍កសិកម្មទំនើប តម្រូវឱ្យកសិករដែលជាសមាជិកត្រូវធ្វើផលិតកម្មកសិកម្មរួមគ្នា និងមានការគ្រប់គ្រងប្រកបដោយវិជ្ជាជីវៈខ្ពស់ ដើម្បីបង្កើនសមត្ថភាពប្រកួតប្រជែងនៅលើទីផ្សារទាំងខាងផ្នែកគុណភាព តម្លៃ និងនិរន្តរភាពនៃការផ្គត់ផ្គង់៕