ភ្នំពេញ៖ សាជីវកម្មធានាឥណទានកម្ពុជា (CGCC) រៀបចំកម្មវិធីកសាងសមត្ថភាពសហគ្រិនរបស់សាជីវកម្មធានាឥណទានកម្ពុជា - Entrepreneurship Program Initiative of CGCC (EPIC) វគ្គទី២ នៃឆ្នាំ២០២៤។ តាមរយៈកម្មវិធីនេះ CGCC នឹងជ្រើសរើសម្ចាស់អាជីវកម្ម និងសហគ្រាសខ្នាតមីក្រូ តូច និងមធ្យម (MSMEs) មកបណ្តុះបណ្តាលចំណេះដឹងហិរញ្ញវត្ថុ សហគ្រិនភាព និងការប្រើប្រាស់កម្ចីដែលមានការធានាប្រកបដោយប្រសិទ្ធភាព និងការទទួលខុសត្រូវ។

ចំពោះកម្មវិធីបណ្តុះបណ្តាល ដែលនឹងរៀបចំឡើងនៅថ្ងៃទី២0 ខែកក្កដា ឆ្នាំ២០២៤ វេលាម៉ោង ៨:៣០ព្រឹក ដល់ម៉ោង ៥:០០នាទីល្ងាច នឹងផ្តោតលើប្រធានបទដូចជា៖ គន្លឹះក្នុងការទទួលបានកម្ចីផ្លូវការ និងការប្រើប្រាស់កម្ចីដោយការទទួលខុសត្រូវ និងប្រសិទ្ធភាព និងយន្តការធានាឥណទាន ក្នុងការគាំទ្រលទ្ធភាពទទួលបានហិរញ្ញប្បទានរបស់សហគ្រាសខ្នាតតូច និងមធ្យម។ កម្មវិធីនេះ ក៏នឹងផ្តោតលើនីតិវិធីនៃការវាយតម្លៃឥណទាន និងផលិតផលឥណទានដែលមានការធានា សម្រាប់អាជីវកម្មក្នុងវិស័យកសិកម្មផងដែរ។

ចំពោះ សិក្ខាកាមដែលត្រូវជ្រើសរើសសម្រាប់ EPIC វគ្គទី២នេះ គឺត្រូវតែជាម្ចាស់អាជីវកម្ម ឬជាអ្នកធ្វើការសម្រេចចិត្តនៃ MSMEs ដែលស្ថិតនៅក្នុងវិស័យកសិកម្ម ឬអាជីវកម្មដែលពាក់ព័ន្ធ ឬបម្រើដល់វិស័យកសិកម្ម, មានអាជីវកម្មដែលប្រតិបត្តិការយ៉ាងហោចណាស់ ១ឆ្នាំ, មានតម្រូវការកម្ចីពីធនាគារ/គ្រឹះស្ថានមីក្រូហិរញ្ញវត្ថុ សម្រាប់ជាទុនបង្វិល ឬពង្រីកអាជីវកម្ម និងសហគ្រិនស្រ្តីត្រូវបានផ្តល់អាទិភាព។

EPIC នឹងចាប់ផ្តើមទទួលពាក្យ ចាប់ពីថ្ងៃទី២៥ ខែមិថុនា ឆ្នាំ២០២៤ ចំណែកថ្ងៃផុតកំណត់ទទួលពាក្យវិញ គឺថ្ងៃទី១២ ខែកក្កដា ឆ្នាំ២០២៤ ដូច្នេះម្ចាស់សហគ្រាសដែលមានបំណងចូលរួមអាចចុះឈ្មោះតាមរយៈតំណភ្ជាប់ https://forms.gle/LRYjbW7rfg4Zovzz5។ បើតាមការចុះផ្សាយរបស់ CGCC នាថ្ងៃទី២៦ ខែមិថុនា ឆ្នាំ២០២៤ កម្មវិធី EPIC ដែលរៀបចំនៅមជ្ឈមណ្ឌលអភិវឌ្ឍន៍ធុរកិច្ច ជាន់ទី១៥នេះ គឺត្រូវបានគាំទ្រដោយគម្រោង Feed the Future Cambodia Harvest III របស់ USAID, CGCC និង សមាគមសហគ្រិនវ័យក្មេងកម្ពុជា (YEAC)៕