ភ្នំពេញ៖ គិតត្រឹមឆ្នាំ២០២៣ កម្ពុជាទទួលបានវិនិយោគផ្ទាល់ពីបរទេសមានចំនួន ១៩៧,៨ទ្រីលានរៀល ស្មើនឹង ៤៨,៤ប៊ីលានដុល្លារ ដែលមានកំណើនជិត ៨%បើធៀបនឹងឆ្នាំមុន។ នេះបើតាមការចុះផ្សាយរបស់ធនាគារជាតិ នៃកម្ពុជា កាលពីថ្ងៃទី១៩ ខែមិថុនា ឆ្នាំ២០២៤។

ធនាគារជាតិ នៃកម្ពុជា បានបញ្ជាក់ថា ប្រភពទុនវិនិយោគចម្បងរបស់កម្ពុជា គឺមកពីប្រទេសចិនដែលរាប់បញ្ជូលទាំងតៃវ៉ាន់ ហុងកុង និងម៉ាកាវ មានចំនួន ៤៥,៦% នៃវិនិយោគផ្ទាល់បរទេសសរុប។ ចំពោះប្រទេសដែលមានប្រភពទុនវិនិយោគមកលើកម្ពុជាបន្ទាប់ពីប្រទេសចិន គឺប្រទេសកូរ៉េខាងត្បូងដែលមានចំនួនជិត ១២%, សិង្ហបុរីមាន ៦,៥%, ជប៉ុនមានចំនួន ៦,២%, វៀតណាមមាន ៥,៣%, ម៉ាឡេស៊ីមានចំនួន៤,៤%, ថៃមាន ៤%, កាណាដាមានចំនួន ៣,៥% និងចក្រភពអង់គ្លេសមានចំនួន៣,២%។

លំហូរវិនិយោគផ្ទាល់ពីបរទេសនេះ ត្រូវបានស្រូបទាញដោយវិស័យចម្បងៗ ដូចជា៖ វិស័យហិរញ្ញវត្ថុមានចំនួន២៣,៣%, កម្មន្តសាលមាន ២២,៣%, អចលនទ្រព្យមានការវិនិយោគចំនួន ១១,២%, សណ្ឋាគារនិងការកម្សាន្តទទួលបាន ១០,១%, កសិកម្មមានចំនួន ៩,២%, ថាមពលទទួលបាន ៦,២%, សំណង់មានការវិនិយោគចំនួនជិត ៦% និងមានវិស័យផ្សេងៗទៀត។ គួរជម្រាបថា ក្នុងខែឧសភា ឆ្នាំ២០២៤ កន្លងទៅ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន២៥ ដែលមានទុនវិនិយោគសរុបប្រមាណជាង ២៤៦លានដុល្លារ ដែលអាចបង្កើតការងារបានប្រមាណ ១៥ពាន់កន្លែង៕