ភ្ភ្នំពេញ៖ រដ្ឋបាលជលផល នៃក្រសួងកសិកម្ម បានឱ្យបំផ្លាញចោលត្រីពីរ៉ាន់ញ៉ាជាប្រភេទត្រីកាចសាហាវ និងស៊ីសាច់ជាអាហារ ក្រោយកាលពីពេលថ្មីៗនេះ ឃើញមានការផ្សព្វផ្សាយលើបណ្តាញ TikTok និងហ្វេសប៊ុក អំពីការនាំចូល និងលក់ចែកចាយប្រភេទត្រីពីរ៉ាន់ញ៉ា(Piranha)នេះ។ ទាក់ទិននឹងការនាំចូលនិងចែកចាយត្រីប្រភេទពីរ៉ាន់ញ៉ា ដែលមានលក្ខណៈកាចសាហាវ និងស៊ីសាច់ជាអាហានេះ រដ្ឋបាលជលផល បានចុះត្រួតពិនិត្យនិងអនុវត្តច្បាប់ដល់ទីកន្លែងតាំងពីថ្ងៃទី០៦ខែសីហា ឆ្នាំ២០២៣មកម្ល៉េះ ហើយបានម្ចាស់អាជីវកម្មបានធ្វើកិច្ចសន្យាឈប់នាំចូល និងបានបំផ្លាញត្រីនេះ តាមវិធានការរបស់រដ្ឋបាលជលផល។ នេះតាមសេចក្តីប្រកាសព័ត៌មានរបស់ក្រសួង នៅថ្ងៃទី១៣ ខែសីហានេះ។

ទន្ទឹមនឹងនេះ ក្រសួងកសិកម្មរុក្ខាប្រមាញ់ និងនេសាទ ក៏បានហាមឱ្យសាធារណជន និងអាជីវករទាំងអស់ មិនឱ្យនាំចូលប្រភេទត្រីពីរ៉ាន់ញ៉ា ឬប្រភេទត្រីផ្សេងទៀត ដែលអាចនាំឱ្យមានផលប៉ះពាល់ដល់ប្រភេទត្រីធម្មជាតិ ក៏ដូចមនុស្សសត្វ និងបរិស្ថាន។ ក្រសួងកសិកម្ម បញ្ជាក់ថា ក្នុងករណីដែលប្រជាពលរដ្ឋដឹងអំពីការនាំចូលត្រីពីរ៉ាន់ញ៉ា ឬប្រភេទត្រីកាចសាហាវផ្សេងទៀត យកមកចិញ្ចឹម ឬចិញ្ចឹមលម្អ ត្រូវរាយការណ៍ដល់សមត្ថកិច្ចជំនាញជលផល ដើម្បីចាត់វិធានការតាមច្បាប់។ ចំពោះ អ្នកដែលបាននិងកំពុងចិញ្ចឹមប្រភេទត្រីទាំងនេះ ហាមយកទៅលែងក្នុងបឹងធម្មជាតិ និងត្រូវប្រគល់ឱ្យរដ្ឋបាលជលផល៕