ភ្នំពេញ៖ អគ្គិសនីកម្ពុជា បានពន្យល់ពីការប្រើថាមពលអគ្គិសនីកើនឡើងច្រើននារដូវក្តៅ ដោយចន្លោះពីខែមីនា ដល់ ខែឧសភា គឺបរិមាណប្រើប្រាស់ថាមពលអគ្គិសនីរបស់ប្រជាពលរដ្ឋមានការកើនឡើង ដែលធ្វើឱ្យប្រព័ន្ធផលិតកម្មរបស់អគ្គិសនីកម្ពុជា ក៏កើនឡើងផងដែរ។

បើតាមការចុះផ្សាយរបស់អគ្គិសនីកម្ពុជា កាលពីថ្ងៃទី២៣ ខែឧសភា ឆ្នាំ២០២៤ អគ្គិសនីកម្ពុជា បានបញ្ជាក់ថា កំណើនបរិមាណកើនឡើងនេះ គឺធម្មតាដូចរដូវក្តៅឆ្នាំកន្លងទៅតាមកំណើននៃការប្រើប្រាស់របស់ប្រជាពលេដ្ឋ។ ជាមួយគ្នានេះ អគ្គិសនីកម្ពុជា បានអំពាវនាវឱ្យប្រជាពលរដ្ឋមួយចំនួនតូច កុំឱ្យប្រើប្រាស់ប្រព័ន្ធសង្គម Facebook ផ្សព្វផ្សាយពីកំណើនថាមពលប្រើប្រាស់ ដែលមិនបានពិនិត្យមើលច្បាស់លាស់លើការប្រើប្រាស់របស់ខ្លួន។ ការបង្ហោះតាមបណ្តាញសង្គម Facebookនេះ មិនមែនជាដំណោះស្រាយនោះទេ តែវាធ្វើឱ្យប៉ះពាល់កិត្តិយស និងកេរ្តិ៍ឈ្មោះរបស់អគ្គិសនីកម្ពុជាដែលខិតខំបម្រើសេវាផ្គត់ផ្គង់។

ប្រសិនបើប្រជាពលរដ្ឋ មានចម្ងល់ពាក់ព័ន្ធនឹងការប្រើប្រាស់ថាមពលអគ្គិសនីមានការកើនឡើងមិនប្រក្រតី អាចមកកាន់បណ្តាសាខានៅរាជធានីភ្នំពេញ ឬអគ្គិសនីខេត្តចំណុះរបស់អគ្គិសនីកម្ពុជាដោយផ្ទាល់ ឬទំនាក់ទំនងតាមរយៈលេខទូរសព្ទនៅលើវិក្កយបត្រ ឬទំព័របណ្តាញសង្គម Facebook ផ្លូវការរបស់ «អគ្គិសនីកម្ពុជា-EDC» ឬទំនាក់ទំនងទីស្នាក់ការកណ្តាលអគ្គិសនីកម្ពុជា តាមរយៈលេខទូរសព្ទ ១២៩៨ ដើម្បីឱ្យអគ្គិសនីកម្ពុជា ចុះត្រួតពិនិត្យប្រព័ន្ធនាឡិកាស្ទង់ជូនដោយឥតគិតថ្លៃ៕