ភ្នំពេញ៖ អគ្គនាយកដ្ឋានពន្ធដារ បានដាក់ចេញនូវខិត្តប័ណ្ណ ស្តីពី ពន្ធលើមធ្យោបាយដឹកជញ្ជូន ដើម្បីឱ្យអ្នកជាប់ពន្ធឈ្វេងយល់កាន់តែច្បាស់ អនុវត្តឱ្យបានត្រឹមត្រូវតាមច្បាប់ និងលិខិតបទដ្ឋានគតិយុត្តពាក់ព័ន្ធ។ ពិសេស ដើម្បីត្រៀមប្រកាស និងបង់ប្រាក់ពន្ធលើមធ្យោបាយដឹកជញ្ជូនសម្រាប់ឆ្នាំ២០២៤ ដែលនឹងចាប់ផ្តើម នៅថ្ងៃទី១ ខែមិថុនា ឆ្នាំ២០២៤។ នេះបើតាមព្រឹត្តិបត្រព័ត៌មានប្រចាំសប្តាហ៍របស់អគ្គនាយកដ្ឋានពន្ធដារ ចេញផ្សាយនៅថ្ងៃទី២៣ ឧសភា។

អគ្គនាយកដ្ឋានពន្ធដារ បានបញ្ជាក់ថា ពន្ធលើមធ្យោបាយដឹកជញ្ជូន គឺជាពន្ធប្រចាំឆ្នាំដែលអនុវត្តលើមធ្យោបាយដឹកជញ្ចូនគ្រប់ប្រភេទនៅក្នុងប្រទេសកម្ពុជា ដែលជាអាទិ៍ រួមមាន៖ កប៉ាល់ សាឡង់ ទូក កាណូត អូប័រ រថយន្ត ក្បាលរថយន្តសណ្តោង រ៉ឺម៉កសណ្តោង ស៊ឺមីរ៉ឺម៉កសណ្តោង ទោចក្រយានយន្ត ត្រីចក្រយានយន្ត ត្រាក់ទ័រ និងគ្រឿងយន្តប្រហាក់ប្រហែល។

អគ្គនាយកដ្ឋានពន្ធដារ បានលើកយកចំណុចសំខាន់ៗ នូវក្នុងខិត្តប័ណ្ណស្ដីពីពន្ធលើមធ្យោបាយដឹកជញ្ជូននោះ រួមមាន៖ កម្មវត្ថុពន្ធ និងនិយមន័យពាក្យគន្លឹះសំខាន់ៗ, ការលើកលែងពន្ធ, អត្រាពន្ធ និងការគណនាប្រាក់ពន្ធ, កាតព្វកិច្ច និងបែបបទនៃការប្រកាសនិងបង់ប្រាក់ពន្ធ, ឯកសារភ្ជាប់សម្រាប់ការចុះបញ្ជីឬធ្វើបច្ចុប្បន្នភាពយានយន្ត និងរបៀបប្រើប្រាស់កម្មវិធីគណនាពន្ធលើមធ្យោបាយដឹកជញ្ចូន (GDT Means of Transportation Tax Calculation)៕