ភ្នំពេញ៖ កម្ពុជា នឹងមានភ្លៀងធ្លាក់ពីបង្គួរទៅច្រើននៅតាមបណ្តាខេត្តមួយចំនួន និងនៅតំបន់មាត់សមុទ្រ ដោយមានលាឡំជាមួយនឹងខ្យល់កន្ត្រាក់ ចាប់ពីថ្ងៃទី២៦-៣០ ខែកញ្ញា ឆ្នាំ២០២៣។

បើតាមការព្យាករពីស្ថានភាពធាតុអាកាសរបស់ក្រសួងធនធានទឹក និងឧតុនិយម កាលពីថ្ងៃទី២៤ កញ្ញានេះ កម្ពុជា នឹងទទួលរងឥទ្ធិពលប្រព័ន្ធសម្ពាធទាបសកម្មមួយពីសមុទ្រចិនខាងត្បូង រំកិលចូលមកតំបន់ព្រំប្រទល់កម្ពុជា-ឡាវ បន្តរហូតមកដល់ស្របតាមជួរភ្នំដដរែក។

ការរងសម្ពាធធាតុអាកាសពីសមុទ្រចិនខាងត្បូង អូសកាត់មកលើកម្ពុជានេះ ធ្វើឱ្យតំបន់ខ្ពង់រាបភាគឦសាន ខ្ពង់រាបភាគខាងជើង និងតំបន់ទំនាបកណ្តាលភាគពាយ័ព្យ អាចមានភ្លៀងធ្លាក់ពីបង្គួរទៅច្រើន ចាប់ពីថ្ងៃទី២៦-២៨ ខែកញ្ញានេះ។ ចំណែក តំបន់មាត់សមុទ្រ ចាប់ពីថ្ងៃទី២៧-២៨ ខែកញ្ញា អាចមានភ្លៀងធ្លាក់ពីបង្គួរទៅច្រើនដោយលាយឡំជាមួយនឹងខ្យល់កន្ត្រាក់នៅលើផ្ទៃសមុទ្រ មានខ្យល់បក់បោកខ្លាំងនិងរលកខ្ពស់ៗ៕