ភ្នំពេញ៖ តាមរយៈវិទ្យាស្ថានជំនាញរបស់ក្រសួងការងារ មានផ្តល់វគ្គបណ្តុះបណ្តាលដល់ម្ចាស់អាជីវកម្ម, បុគ្គលិក និងយុវជន ស្តីពីសហគ្រិនភាព និងការបណ្តុះបណ្តាលជំនាញបច្ចេកទេសនានា។ ការផ្តល់វគ្គបណ្តុះបណ្តាលដែលជួយពង្រឹងសមត្ថភាពបន្ថែមនោះ មិនត្រូវបានគិតថ្លៃឡើយ។

ឯកឧត្តមរដ្ឋមន្ត្រី ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងជំនួបជាមួយនឹងប្រតិភូសមាគមសហគ្រិនស្ត្រីកម្ពុជា បានឱ្យដឹងថា ម្ចាស់អាជីវកម្មដែលចង់អភិវឌ្ឍសហគ្រិនភាព រួមទាំងបុគ្គលិកដើម្បីពង្រឹងអាជីវកម្មរបស់ខ្លួន អាចចូលរួមសិក្សាទាំងនោះនៅគ្រប់ទីតាំងនានា ដែលស្ថិតក្រោមដែនសមត្ថកិច្ចរបស់ក្រសួងការងារ និងបណ្តុះបណ្តាលវិជ្ជាជីវៈ។ កម្មវិធីបណ្តុះបណ្តាលនេះ ត្រូវបានឯកឧត្តមរដ្ឋមន្ត្រីការងារបញ្ជាក់ថា មានភាពបត់បែនខ្ពស់ មានកម្រិតស្តង់ដា ដែលសិក្ខាកាមអាចសិក្សាបាននៅពេលយប់ ឬចុងសប្តាហ៍បាន។

ការផ្តល់វគ្គបណ្តុះបណ្តាលដែលទាក់ទងនឹងសហគ្រិនភាព និងការបណ្តុះបណ្តាលជំនាញបច្ចេកទេសនានា តាមរយៈវិទ្យាស្ថានជំនាញរបស់ក្រសួងការងារនោះ ឆ្លើយតបនឹងគោលនយោបាយរបស់រាជរដ្ឋាភិបាលអាណត្តិទី៧។ គោលនយោបាយនោះ ផ្តល់ការគាំទ្រនិងលើកទឹកចិត្តដល់ជីវកម្មលក្ខណៈគ្រួសារ ឬសហគ្រាសខ្នាតតូច ឬអ្នកប្រកបអាជីវកម្មផ្នែកសេដ្ឋកិច្ចក្រៅប្រព័ន្ធ និងតូចតាច ដើម្បីអាចពង្រីក និងអភិវឌ្ឍអាជីវកម្មរបស់ខ្លួនឲ្យក្លាយទៅជាអាជីវកម្មផ្លូវការ និងមានស្តង់ដារ។

នាជំនួបដែលធ្វើនៅទីស្តីការក្រសួងការងារ កាលពីថ្ងៃទី២០ ខែកញ្ញា ឆ្នាំ២០២៣នេះ ឯកឧត្តមរដ្ឋមន្ត្រី បានជំរុញឱ្យសមាគមសហគ្រិនស្ត្រី ក៏ដូចជាក្រុមហ៊ុនឯកជនទាំងអស់ ត្រៀមស្វែងរកចំណុច ឬបញ្ហារួមរបស់វិស័យឯកជន ដើម្បីលើកឱ្យរដ្ឋាភិបាលដោះស្រាយឱ្យចំគោលដៅ ក្នុងវេទិការដ្ឋនិងឯកជន ដែលគ្រោងនឹងធ្វើនៅក្នុងខែវិច្ឆិកា ឆ្នាំ២០២៣ខាងមុខ៕