ភ្នំពេញ៖ មនុស្សដែលកើតឆ្នាំរោង គឺជាមនុស្សមានចិត្តបុណ្យសុន្ទរទាន់ចូលចិត្តជួយអ្នកដទៃ មានវាចាមុះមុត សតិបញ្ញាឈ្លាសវៃ ចិត្តស្រាលឆាប់ខឹងឆាប់បាត់ ពេញចិត្តនឹងរស់កាម្មារមណ៍មិនចេះនឿយណាយ។ បើតាមការទស្សទាយ នៅក្នុងសៀវភៅមហាសង្រ្កាន្ត ឆ្នាំរោង ឆស័ក ព.ស ២៥៦៨.គ.ស.២០២៤ មនុស្សដែលកើតឆ្នាំរោង អាចឱ្យខ្លួនធំដុំបានដោយខ្លួនឯង និងមានជោគលាភធំម្តងម្កាល។

មនុស្សកើតឆ្នាំរោង ពង្សទេវតាប្រុស នាមជាសត្វនាគរាជ ធាតុមាស អន្សា កំណើតនៅថ្ងៃព្រហស្បតិ៍សិរីធ្លាក់មកពីដើមទ្រូងព្រះព្រហ្មមូលព្រលឹងនៅនឹងដើមឫស្សី និងដើមរកា។ មនុស្សដែលកើតឆ្នាំនេះ កាល បើទៅតាំងលំនៅទីណាត្រូវរករំសេវឬដីខ្សាច់ទៅជាប់ ដើម្បីបំពេញគុម្ព ឬគល់នៃដើមឫស្សី ឬដើមរការ ដើម្បីជាសិរីមង្គលដល់ខ្លួន និងក្រុមគ្រួសារ។ មនុស្សកើតឆ្នាំនេះ តែងមានព្រះកេតុថែរក្សាអរិសត្រូវមិនអាចប៉ុនប៉ងពាធាបានឡើយ ព្រមទាំងរមែងជាមនុស្សមាននិស្ស័យនិងជោគសំណាងល្អ និងមានសេចក្តីសុខកាយសប្បាយចិត្ត ចៅហ្វាយនាយចិញ្ចឹមបីបាច់រក្សា នឹងបានទៅជាអ្នកមាន បុណ្យស័ក្តិ រហូតមានកិត្តិយសកត្តិនាមល្បីល្បាញ។

មនុស្សឆ្នាំរោង តែងទទួលជោគលាភពីភេទផ្ទុយគ្នា ពិសេសការធ្វើការជាមួយមនុស្សផ្ទុយភេទ នឹងតែងតែទទួលផលបានល្អជាវិសេស។ មុខរបរដែលសក្កិសមបំផុតគឺ «ទទួលយកអាសា» ចំពោះការងារដែលអ្នកផ្សេងធ្វើមិនកើត ហើយឱ្យអ្នកដែលកើតឆ្នាំរោង ទទួលធ្វើរមែងតែងបានទទួលលទ្ធផលល្អជាវិសេស នឹងបានទៅអ្នកមានស្ដុកស្ដម្ភកាលបើដល់វ័យជរា។

ប្រភព៖ ដកស្រង់ពីសៀវភៅមហាសង្ក្រាន្ត ឆាំ្នរោង ឆស័ក ចុល្លសករាជ១៣៨៦ មហាសករាជ១៩៤៦ គណនានិងរៀបរៀងដោយ ឯកឧត្តម អ៊ឹម បុរិន្ទ ទីប្រឹក្សាអមគណៈកម្មាធិការជាតិរៀបចំបុណ្យជាតិ-អន្តរជាតិ និងជាគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ៕