ភ្នំពេញ៖ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានសម្រេចបង្កើតគណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងផែនការ ដែលមានសមាសភាពសរុបចំនួន ១៩នាក់ ក្នុងគោលបំណងគាំទ្រកិច្ចដំណើរការរបស់មន្ទីរពេទ្យគន្ធបុប្ផា តាមរយៈការផ្សព្វផ្សាយ អំពាវនាវ និងបំផុសចលនាកៀរគរការបរិច្ចាគពីមន្ត្រីគ្រប់ជាន់ថ្នាក់ចំណុះក្រសួង។

បើតាមសេចក្តីសម្រេច ស្តីពីការបង្កើតគណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងផែនការ មានភារកិច្ចរាយការណ៍អំពីវឌ្ឍនភាពនៃការចូលរួមបរិច្ចាគ និងធ្វើបច្ចុប្បន្នភាពបញ្ជីឈ្មោះសប្បុរសជន ដែលចូលរួមបរិច្ចាគដោយមានឈ្មោះ ជាភាសាខ្មែរ អក្សរឡាតាំង ភេទ ចំនួនថវិកាបរិច្ចាគ និងលេខទូរសព្ទ បញ្ជូនមកលេខាធិការដ្ឋានមូលនិធិគន្ធបុប្ផាកម្ពុជា ដើម្បីបូកសរុប និងផ្សព្វផ្សាយជាសាធារណៈ ឱ្យបានទាន់ពេលវេលាក្នុងទិសដៅតម្លាភាព និងផ្តល់ទំនុកចិត្តដល់សាធារណជន។ បើតាមសេចក្តីសម្រេចដដែល ដែលចេញផ្សាយកាលពីថ្ងៃទី១៦ ខែមេសា ឆ្នាំ២០២៤នេះ គណៈកម្មការទ្រទ្រង់មូលនិធិគន្ធបុប្ផាកម្ពុជា ក៏ត្រូវបំពេញភារកិច្ចផ្សេងទៀតតាមការណែនាំរបស់លេខាធិការដ្ឋានមូលនិធិគន្ធបុប្ផាកម្ពុជាផងដែរ។

នៅក្នុងគណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងផែនការនេះ មានឯកឧត្តមរដ្ឋមន្ត្រី ប៊ិន ត្រឈៃ ជាប្រធាន, លោកជំទាវរដ្ឋលេខាធិការ ជួន សារុន និងឯកឧត្តមរដ្ឋលេខាធិការ លេង ផាលី និងឯកឧត្តមរដ្ឋលេខាធិការ ទាន សុសេរី ដែលជានាយកខុទ្ទកាល័យ រដ្ឋមន្ត្រីក្រសួងផែនការ ជាអនុប្រធាន ខណៈដែលមានលោក មន្ត ច័ន្ទសារៈ ប្រធាននាយកដ្ឋានផែនការសង្គមកិច្ច នៃអគ្គនាយកដ្ឋានផែនការលេខាធិការ ជាលេខាធិការនៃគណៈកម្មការទ្រទ្រង់មូលនិធិនេះ៕