ភ្នំពេញ៖ សហគ្រាស CHN ENERGY ដែលមានទុនវិនិយោគជាង ១ពាន់លានដុល្លារ កំពុងពិនិត្យ និងពិភាក្សាអំពីកាលានុវត្តភាពវិនិយោគលើគម្រោងថាមពលកកើតឡើងវិញ នៅកម្ពុជា។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី០៨ ខែមេសា ឆ្នាំ២០២៤។

ក្នុងជំនួបពិភាក្សាជាមួយឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា លោក អាយ ស៊ាង តំណាងឱ្យសហគ្រាស CHN ENERGY បានលើកឡើងអំពីបំណងបណ្តាក់ទុនវិនិយោគ លើគម្រោងថាមពលកកើតឡើងវិញ ដែលមានជាអាទិ៍គម្រោងសាងសង់ និងប្រតិបត្តិការវារីអគ្គិសនី និងគម្រោងថាមពលដើរដោយពន្លឺព្រះអាទិត្យ។ ក្នុងជំនួបនេះ លោក អាយ ស៊ាង បានបន្តថា កម្ពុជា គឺជាទីតាំងយុទ្ធសាស្ត្រប្រកបដោយសក្តានុពលក្នុងការប្រកបធុរកិច្ចលើវិស័យខាងលើ អបដោយអេកូឡូស៊ីគាំទ្រដល់ប្រតិបត្តិការអាជីវកម្មប្រកបដោយភាពទាក់ទាញ និងលេចធ្លោជាងគេក្នុងតំបន់។

ឯកឧត្តម សួន សុផល បានស្វាគមន៍អំពីបំណងរបស់សហគ្រាសក្នុងការបណ្តាក់ទុនវិនិយោគ និងបានបបញ្ជាក់ប្រាប់តំណាងសហគ្រាសអំពីការត្រៀមលក្ខណៈរបស់ក្រុមប្រឹក្សាអភិវឌ្ឍន៍កម្ពុជា ក្នុងការផ្តល់កិច្ចសម្រួលវិនិយោគជូនសមភាគីប្រកបដោយទំនុកចិត្តខ្ពស់ ដោយហេតុថានិន្នាការតំបន់ និងអន្តរជាតិ កំពុងតែបោះជំហានក្នុងការធ្វើបរិវត្តកម្មថាមពលទៅជាថាមពលបៃតង ហើយសកម្មភាពវិនិយោគលើវិស័យនេះ ក៏បានចែងយ៉ាងច្បាស់ក្នុងមាត្រា២៤ នៃច្បាប់ស្តីពីវិនិយោគនៃប្រទេសកម្ពុជា៕