ភ្នំពេញ៖ គណៈប្រតិភូវិនិយោគិនចិន មកពីទីក្រុងប៉េកាំង និងខេត្តអានហួយ មានបំណងវិនិយោគក្នុងវិស័យឧស្សាហកម្មឈើដាំ និងវិស័យកម្មន្តសាលវាយនភណ្ឌពីដើមទីដល់ចុងទីនៅកម្ពុជា។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា ថ្ងៃទី១៣ ខែសីហា ឆ្នាំ២០២៥។

ឯកឧត្តម លឹម វិសាល អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានគាំទ្រនូវមានបំណងបណ្តាក់ទុននៅកម្ពុជា របស់វិនិយោគិនចិន ព្រោះគម្រោងទាំងពីរនេះជាប្រភេទគម្រោង ដែលទទួលបានការលើកទឹកចិត្តដូចមានចែងក្នុងច្បាប់និងបទប្បញ្ញត្តិជាធរមាន។

គួរបញ្ជាក់ថា ការវិនិយោគលើកម្មន្តសាលវាយនភណ្ឌពីដើមទីដល់ចុងទី (ការផលិតក្រណាត់ ឡេវ រហូតដល់ចេញជាសម្លៀកបំពាក់) គឺស្របនឹងគោលនយោបាយរបស់រាជរដ្ឋាភិបាលក្នុងការជំរុញលើកទឹកចិត្តឱ្យមានការផលិតវត្ថុធាតុដើមក្នុងស្រុកឱ្យបានច្រើនជាអតិបរិមា ដើម្បីបង្កើនតម្លៃបន្ថែម និងបំពេញតម្រូវការទីផ្សារនាំចេញ ជាពិសេសនៅពេលដែលកម្ពុជា ចាកចេញពីក្រុមប្រទេសអភិវឌ្ឍន៍តិចតួច ដែលវិធានប្រភពដើមទំនិញសម្រាប់ការនាំចេញទៅកាន់ទីផ្សារសហគមន៍អឺរ៉ុប នឹងទាមទារឱ្យមានការបម្លែងពីរដំណាក់កាល (double transformation)៕