ភ្នំពេញ ថ្ងៃទី៣០ ខែកញ្ញា ឆ្នាំ២០២៦ អង្គការយូនីសេហ្វ (UNICEF) មើលឃើញភាពជាដៃគូរវាងរដ្ឋ និងឯកជន ក្នុងវិស័យផ្គត់ផ្គង់ទឹកស្អាតនៅកម្ពុជា ថាអាចជាគំរូសម្រាប់ប្រទេសដទៃ។ នេះជាការលើកឡើងរបស់លោកស្រីបណ្ឌិត Maha Damaj តំណាងអង្គការយូនីសេហ្វនៅកម្ពុជា ដែលទើបតែងតាំងថ្មី ក្នុងជំនួបជាមួយ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ភាគីទាំងពីរបានពិភាក្សាអំពីការអនុវត្ត “គម្រោងហេដ្ឋារចនាសម្ព័ន្ធទឹកស្អាត និងអនាម័យសម្រាប់សហគ្រាស” (WISE) កិច្ចសហការជាមួយប្រតិបត្តិករទឹកស្អាតឯកជន និងការត្រៀមលក្ខណៈទប់ទល់នឹងហានិភ័យកង្វះទឹកដែលអាចបង្កឡើងដោយបាតុភូត El Niño។

លោកស្រី Maha Damaj បានលើកឡើងថា៖ “គម្រោង WISE មានលក្ខណៈនវានុវត្តន៍ខ្ពស់ និងជាគំរូនៃភាពជាដៃគូរវាងរដ្ឋ និងឯកជន ដែលយើងមើលឃើញថាជាទិសដៅអនាគតនៃការធានាសិទ្ធិមូលដ្ឋានក្នុងការទទួលបានទឹកស្អាត និងមានសុវត្ថិភាពសម្រាប់គ្រួសារ និងកុមារ។ គម្រោងនេះមានលក្ខណៈឈានមុខក្នុងទិដ្ឋភាពជាច្រើន ហើយយើងជឿថា កម្ពុជាអាចបង្ហាញគម្រោងជាគំរូនៃភាពជាដៃគូទៅកាន់ពិភពលោក។”

លោកស្រីបានបន្ថែមថា នាយកសកលរបស់យូនីសេហ្វ ទទួលបន្ទុកទឹកស្អាត និងអនាម័យ គ្រោងមកបំពេញទស្សនកិច្ចនៅកម្ពុជានាពេលខាងមុខ ដើម្បីស្វែងយល់ពីគម្រោងនេះ និងពិនិត្យលទ្ធភាពចងក្រងជាករណីសិក្សាសម្រាប់ប្រទេសដទៃដែលកំពុងប្រឈមបញ្ហាទឹកស្រដៀងគ្នា។

ឯកឧត្តម ហែម វណ្ណឌី បានលើកឡើងថា គម្រោង WISE គាំទ្រដល់កំណែទម្រង់ទូលំទូលាយរបស់ក្រសួងក្នុងវិស័យទឹកស្អាត រួមទាំងផ្នែកអភិបាលកិច្ច ប្រតិបត្តិការបច្ចេកទេស គុណភាពទឹក ការពង្រីកសេវា ការអនុវត្តច្បាប់និងបទប្បញ្ញត្តសម្រាប់ប្រតិបត្តិករទឹកស្អាតឯកជន។

ឯកឧត្តមបានលើកឡើងថា៖ “ជាមួយធនធានដែលយូនីសេហ្វ និងគម្រោង WISE អាចកៀរគរបាន គម្រោងអាចបង្កើតផលជះកាន់តែធំដល់វិស័យទឹកស្អាត។ គោលដៅរបស់យើងមិនមែនត្រឹមតែពង្រីកការទទួលបានទឹកស្អាតប៉ុណ្ណោះទេ ប៉ុន្តែចង់ប្រែក្លាយទឹកស្អាត ជាកម្លាំងជំរុញសេដ្ឋកិច្ចជនបទ។”

ឯកឧត្តមបានបញ្ជាក់ថា ការពង្រឹងសមត្ថភាពបច្ចេកទេស គុណភាពសេវា និងនិរន្តរភាពហិរញ្ញវត្ថុរបស់ប្រតិបត្តិករទឹកស្អាតឯកជន មានសារសំខាន់ក្នុងការពង្រីកសេវាទឹកស្អាតដែលអាចទុកចិត្តបាន ពិសេសនៅតំបន់ជនបទ។

កិច្ចប្រជុំក៏បានពិភាក្សាអំពីការសហការត្រៀមលក្ខណៈសម្រាប់បាតុភូត El Niño ដោយ យូនីសេហ្វ សន្យាចែករំលែកបទពិសោធន៍ក្នុងការរៀបចំផែនការត្រៀមបម្រុង និងថាការិយាល័យយូនីសេហ្វ នៅប្រទេសមួយចំនួនទៀតក្នុងតំបន់ បានចាប់ផ្តើមការសម្របសម្រួលកិច្ចខិតខំត្រៀមលក្ខណៈទប់ទល់បាតុភូត El Niño ។

ឯកឧត្តម ហែម វណ្ណឌី បានជំរុញឱ្យក្រុមការងារនៃស្ថាប័នទាំងពីរ រៀបចំកិច្ចប្រជុំសម្របសម្រួលគម្រោង WISE លើកបន្ទាប់ឱ្យបានឆាប់ ដើម្បីដោះស្រាយបញ្ហាបច្ចេកទេសដែលនៅសេសសល់ និងជំរុញការអនុវត្តគម្រោងឱ្យទៅមុខបានឆាប់រហ័ស។