ភ្នំពេញ៖ រយៈពេល ០៨ខែ នៃឆ្នាំ២០២៦ កម្ពុជា រកចំណូលបានពីភ្ញៀវទេសចរបរទេស លើការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ បេងមាលា និងកំពង់ផែចុងឃ្នៀសសរុបជាង ២២,៥៤លានដុល្លារ ថយចុះ ២៧,៤៣% បើធៀបរយៈពេលដូចគ្នាឆ្នាំ២០២៥។ រយៈពេល ០៨ខែ ក្នុងឆ្នាំ២០២៦នេះ កម្ពុជាក៏ទទួលបានភ្ញៀវអន្តរជាតិសរុបជាង ៤៧,៤៩ម៉ឺននាក់ មានការថយចុះ ២៩,០៧% បើធៀបនឹងរយៈពេលដូចគ្នាឆ្នាំ២០២៥។

បើតាមការចុះផ្សាយរបស់គ្រឹះស្ថានអង្គរ ចំណូលលក់បណ្ណនៅប្រាសាទកោះកែររយៈពេល ០៨ខែនេះ កម្ពុជាទទួលបានជាង ១៣,៨៣ម៉ឺនដុល្លារ និងទទួលបានចំនួនភ្ញៀវទេសចរបរទេសសរុប ៩ ២២០នាក់។ រីឯ ចំណូលពីការលក់សំបុត្រទូកវិញ កម្ពុជាទទួលបានចំណូលជាង ៥០,៧៦ម៉ឺនដុល្លារ។

ចំពោះ ចំណូលពីការលក់សំបុត្រនៅប្រាសាទបេងមាលាក្នុងរយៈពេល ០៨ខែវិញ ទទួលបាន ១០,៨២ម៉ឺនដុល្លារ និងទទួលបានទេសចរអន្តរជាតិចំនួន ១០ ៨២៨នាក់។ ចំណែក ចំណូលពីការលក់សំបុត្រនៅភ្នំក្បាលស្ពានវិញ ទទួលបាន ៤ ៥​០៥ដុល្លារ និងមានភ្ញៀវបរទេសចំនួន ៩០១នាក់៕