ភ្នំពេញ៖ សម្តេចធិបតី ហ៊ុន ម៉ាណែត បានចេញអនុក្រឹត្យស្តីពី៖«កម្រិតប្រាក់បៀវត្សជាប់ពន្ធប្រចាំខែ និងកម្រិតប្រាក់ចំណូលជាប់ពន្ធប្រចាំឆ្នាំ» ដោយប្រាក់បៀវត្សសម្រាប់និយោជិតនិវាសនជនក្រោម ១,៥លានរៀល មិនជាប់ពន្ធប្រចាំខែឡើយ ខណៈដែលសហគ្រាសឯក បុគ្គល ដែលមានចំណូល ១៨លានរៀលចុះក្រោម ក៏មិនជាប់បង់ពន្ធប្រចាំឆ្នាំនោះដែរ។

បើតាមអនុក្រឹត្យដែលចេញដោយសម្តេចធិបតីនាយករដ្ឋមន្រ្តី ហ៊ុន ម៉ាណែត កាលពីថ្ងៃទី១១ ខែមីនា ឆ្នាំ២០២៤នេះ កម្រិតប្រាក់បៀវត្សជាប់ពន្ធប្រចាំខែ ចំពោះនិយោជិតនិវាសនជនមានចែង ដូចជា ប្រាក់បៀវត្សច្រើនជាង១,៥លានរៀល ដល់ ២លានរៀល ត្រូវបង់អត្រាពន្ធ ៥% , ប្រាក់បៀវត្សលើស ២លានរៀល ដល់ ៨,៥លានរៀល ជាប់អត្រាពន្ធ១០% , ប្រាក់បៀវត្សលើសពី ៨,៥លានរៀល ដល់ ១២,៥លានរៀល ត្រូវជាប់ពន្ធ១៥% និងប្រាក់បៀវត្សលើសពី ១២,៥លានរៀល ជាប់ពន្ធ២០% ។

ចំពោះ កម្រិតប្រាក់ចំណូលជាប់ពន្ធប្រចាំឆ្នាំ សម្រាប់សហគ្រាសឯកបុគ្គល និងចំណែកដែលត្រូវបែងចែកឱ្យសមាជិកម្នាក់ៗរបស់ក្រុមហ៊ុនសហកម្មសិទ្ធិ ដែលមិនត្រូវបានចាត់ទុកជានីតិបុគ្គល ត្រូវបានចាត់ទុក ដូចជា ប្រាក់បៀវត្សលើសពី ១៨លានរៀល ដល់ ២៤លានរៀល ត្រូវបង់អត្រាពន្ធ ៥% , ប្រាក់បៀវត្សលើសពី ២៤លានរៀល ដល់ ១០២លានរៀល ជាប់អត្រាពន្ធ១០% , ប្រាក់បៀវត្សលើសពី ១០២លានរៀល ដល់១៥០លានរៀល ត្រូវជាប់ពន្ធ១៥% និងប្រាក់បៀវត្សលើសពី ១៥០លានរៀល ជាប់ពន្ធ២០%៕