ភ្នំពេញ៖ រាជរដ្ឋាភិបាល លើកលែងពន្ធអប្បបរមា ដល់សហគ្រាសជាគម្រោងវិនិយោគមានលក្ខណសម្បត្តិគ្រប់គ្រាន់ (គ.ល.គ) ដែលអនុលោមតាមមាត្រា២៤ នៃច្បាប់ស្តីពីសារពើពន្ធ ប្រកាសឱ្យប្រើដោយព្រះរាជក្រមលេខ នស/រកម/ ០៥២៣/០០៤ ចុះថ្ងៃទី១៦ ខែឧសភា ឆ្នាំ២០២៣។ នេះបើតាមសេចក្ដីណែនាំស្តីពី៖«ការលើកលែងពន្ធអប្បបរមា ដល់សហគ្រាសជាគម្រោងវិនិយោគមានលក្ខណសម្បត្តិគ្រប់គ្រាន់» ចេញផ្សាយនាថ្ងៃទី០៨ ខែមេសា ឆ្នាំ២០២៤នេះ។

បើតាមសេចក្តីណែនាំរបស់អគ្គនាយកដ្ឋានពន្ធដារ នេះ សហគ្រាសដែលទទួលបានការលើកលែងពន្ធអប្បបរមានេះ ត្រូវមានរបាយការណ៍សវនកម្មឯករាជ្យ និងកាន់បព្ជិាកាគណនេយ្យឱ្យបានត្រឹមត្រូវ។ ចំពោះ សហគ្រាសដែលគម្រោងវិនិយោគមានលក្ខណសម្បត្តិគ្រប់គ្រាន់ ដែលទើបចុះបញ្ជីថ្មី នឹងទទួលបានការលើកលែងពន្ធអប្បបរមា សម្រាប់ឆ្នាំដំបូង ដោយមិនតម្រូវផ្តល់របាយការណ៍សវនកម្មឯករាជ្យមកអគ្គនាយកដ្ឋានពន្ធដារឡើយ ប៉ុន្តែនៅឆ្នាំបន្ទាប់ សហគ្រាសទើបចុះបញ្ជីថ្មីនោះ ត្រូវមានកាតព្វកិច្ចផ្តល់របាយការណ៍សវនកម្មឯករាជ្យមកអគ្គនាយកដ្ឋានពន្ធដារ យ៉ាងយូរត្រឹមដំណាច់ខែមិថុនា នៃឆ្នាំបន្ទាប់។

អគ្គនាយកដ្ឋានពន្ធដារ សង្ឃឹមថា សហគ្រាសដែលគម្រោងវិនិយោគមានលក្ខណសម្បត្តិគ្រប់គ្រាន់ទាំងអស់ ដែលធ្វើសកម្មភាពអាជីវកម្ម នៅប្រទេសកម្ពុជា ត្រូវយកចិត្តទុកដាក់អនុវត្តតាមខ្លឹមសារនៃសេចក្ដីណែនាំនេះឱ្យមានប្រសិទ្ធភាពខ្ពស់៕